Stepnogorda bir otbasynyń 5 adamy saıajaımen birge órtenip ketti
STEPNOGOR. QazAqparat - Stepnogor qalasynda saıajaı órtenip, oqıǵa ornynan 5 adamnyń denesi tabyldy, dep habarlaıdy QazAqparat tilshisi.
Qaıǵyly jaǵdaı búgin túnde saǵat 00:50 «Rassvet» saıajaı kooperatıviniń 3-jeli kóshesi, 91 ýchastokte boldy.
Oqıǵa ornynan 1955 jylǵy áıel (saıajaı ıesi), onyń 1976 jyly týǵan balasy, 2013 jáne 2015 jylǵy eki er balanyń (saıajaı ıesiniń nemereleri) kúıgen denesi tabyldy. Sondaı-aq, osy jerden tabylǵan taǵy bir adamnyń aty-jóni anyqtalyp jatyr.
«Órtten saıajaı úıiniń qabyrǵasy, shatyry jáne sol mańda turǵan monshaǵa zaqym keldi. Úıdiń ústińgi jabyny opyrylyp qulaǵan. Órt aýmaǵy 28 sharshy metrdi qurady. Tilsiz jaýdy aýyzdyqtaýǵa TJD jeke quramynan 9 qyzmetker men 2 arnaıy tehnıka, kezekshi jedel-tergeý tobynyń 3 qyzmetkeri men 1 tehnıkasy tartyldy», - deıdi TJD bastyǵy Alekseı Sovetov.
Vedomstvodan atap ótkendeı, qazirgi kezde, oqıǵa ornyna synaq órt zerthanasy jiberildi. Órttiń shyǵý sebepteri osy arqyly anyqtalady.
