Stepnogor jylý ortalyǵyndaǵy apat kez kelgen óńirde qaıtalanýy múmkin – depýtat
«Tutynýshylardy senimdi jáne úzdiksiz jylýmen qamtamasyz etý – turǵyndardyń ál-aýqatynyń negizgi kórsetkishi jáne halyqtyń órkenıetti ómiri úshin mańyzdy qajettilik. Osy turǵyda bıylǵy kóktemde Stepnogordaǵy JEO-da bolǵan apat saldarynan qala turǵyndary birneshe kún jylýsyz qaldy. Bul alańdatarlyq faktor jáne elimizdiń barlyq mekenderin úzdiksiz jylýmen qamtamasyz etý úshin dereý shara qabyldaýǵa shaqyratyn dabyl belgisi», - dedi depýtat Aleksandr Mılıýtın Májilistiń jalpy otyrysynda.
Onyń aıtýynsha, Qazaqstanda kóptegen JEO, sonyń ishinde Stepnogor JEO 50 jyldan astam ýaqyt buryn paıdalanýǵa berilgen.
«JEO, qazandyqtar, jylý jelileri men jylý tutyný júıelerindegi negizgi jáne qosalqy jabdyqtardyń moraldyq jáne fızıkalyq tozýy shekti deńgeıge jetti. Olar kez kelgen ýaqytta isten shyǵýy múmkin, buǵan dálel – jylýmen jabdyqtaý júıelerindegi apattardyń jyl saıyn jıileýi. Mundaı jaǵdaıdyń basty sebebi Qazaqstanda jylý energetıkasy salasynda biryńǵaı saıasat, ony iske asyratyn memlekettik organ joq.
JEO úshin Energetıka mınıstrligi, qazandyqtar úshin – jergilikti atqarýshy organdar, jylý jelileri úshin – Indýstrııa jáne ınfraqurylymdyq damý mınıstrligi men jergilikti atqarýshy organdar jaýapty. Tarıfterdi retteý – Ulttyq ekonomıka mınıstrliginiń sharýasy. Sonymen birge, bul organdardyń quzyretteri naqty ajyratylmaǵan», - deıdi Aleksandr Mılıýtın.
Depýtattyń pikirinshe, osyndaı bytyrańqylyq pen jylý energetıkasy salasynda biryńǵaı saıasattyń bolmaýynan JEO qazandyqtary men týrbınalary ýaqtyly jańartylmaıdy, jylý jelileriniń tozǵan qubyrlary men sorǵy jabdyqtary josparly túrde aýyspaıdy.
«Sondyqtan da Stepnogordaǵy jaǵdaı elimizdiń kez kelgen óńirinde qaıtalanýy múmkin», - dedi Aleksandr Mılıýtın.
Buǵan jol bermeý úshin májilismender Úkimet deńgeıinde respýblıka boıynsha jylý energetıkasy men jylýmen jabdyqtaý jaǵdaıyna taldaý jasaýdy, salada biryńǵaı saıasat ázirlep, ony iske asyrýǵa jaýapty vedomstvo qurýdy surady.
Eske sala ketsek, naýryz aıynda Stepnogordaǵy JEO jylý júıelerindegi aqaýdan, birneshe shaǵynaýdandaǵy kóptegen turǵyn úıler jylýsyz qalǵan edi.
Keıin Energetıka mınıstrligi Stepnogordaǵy jylý elektr ortalyǵynda bolǵan apatqa qatysty jaǵdaıdy jaǵdaıdy túsindirdi.
