Stepnogor turǵyndary sapaly aýyz sýǵa qol jetkizdi

KÓKShETAÝ. QazAqparat - Stepnogor qalasynda qýaty táýligine 48 myń tekshe metrdi quraıtyn Sopka-305 sý tazartý nysanynda júrgizilgen kúrdeli jóndeý jumystary aıaqtalyp, aýyz sýdyń sapasy jaqsardy, dep habarlaıdy QazAqparat tilshisi.

Aqmola oblysynyń energetıka jáne turǵyn úı-kommýnaldyq sharýashylyǵy basqarmasynyń málimetinshe, jańǵyrtý jumystarynyń nátıjesinde qaladaǵy turǵyn úılerge sapaly aýyz sý jetkizilip otyr.

«Jarty ǵasyrdan astam ýaqyt boıy paıdalanylyp kele jatqan tehnologııalyq jabdyqty aýystyrý sýdy tazartýdyń ortasha tıimdiligin 47 paıyzdan 75,3 paıyzǵa deıin arttyrýǵa múmkindik berdi. Qurylystardy qaıta jańartýda nemis óndirisiniń progressıvti tehnologııalary qoldanyldy. Rezervýarlardy basqarý toraby, sondaı-aq, membranalyq tehnologııaǵa kóshýmen súzgi stantsııasy jańǵyrtyldy. Rezervýarlarǵa kúrdeli jóndeý júrgizildi. Sorǵy stantsııasy salyndy. Nysanyń aýmaǵy abattandyrylyp, kúzet pýnkti qoıyldy», - deıdi vedomstvodan.

«Nurly jol» baǵdarlamasy boıynsha kásiporynda aýqymdy apgreıd júrgizildi. Jumys quny shamamen 5,5 mıllıard teńgeni qurady. Osyǵan qaramastan 47 myńnan astam turǵyny bar óndiristik qala úshin tarıf mólsheri ózgergen joq.18 aıǵa sozylǵan jobany súıemeldeýmen jáne baqylaýmen Aqmola oblysynyń energetıka jáne turǵyn úı-kommýnaldyq sharýashylyǵy basqarmasy aınalysty.