Stepnogor mektep-ınternatyndaǵy álimjettik oqıǵasy: dırektor qyzmetinen shettetildi
Keńes barysynda rezonans týdyrǵan oqıǵa hronologııasyn zerdeleýdiń aldyn ala nátıjeleri týraly qurylǵan oblystyq komıssııanyń aqparaty tyńdaldy.
«Áleýmettik jelide taraǵan beınejazbadan oqıǵanyń bıyl 21 qazanda bolǵany anyqtaldy. 8-synyp oqýshysy 7-synyptyń eki oqýshysyn jataqhana bólmesinde uryp-soqqan. Al, onyń synyptasy bul áreketti telefon kamerasyna jazǵan. Sol kúni keshke aralaý barysynda mektep psıhology túsirgen oqýshydan beınejazbany taýyp, ol týraly mektep ákimshiligine habarlaıdy. Óz kezeginde, mektep-ınternat dırektory oqıǵa jaıynda ýákiletti organdardy, quqyq qorǵaý qurylymdaryn, kámeletke tolmaǵandardyń isteri jónindegi komıssııany habardar etpesten, qazan aıynyń 29-ynda osy oqıǵaǵa qatysy bar oqýshylardy mektepten shyǵaryp jibergen», - dep atap ótti vedomstvodan.
Qoǵamdyq rezonans týdyrǵan beınejazbany 12 qarashada qalalyq pablık ákimshisine zardap shekken balalardyń ata-anasy bergen, al ol bolsa, Stepnogor qalasynyń ákimdigine habarlaǵan. Jergilikti atqarýshy organ 13 qarashada BAQ-ty tarta otyryp, kámeletke tolmaǵandardyń isteri jáne olardyń quqyqtaryn qorǵaý jónindegi komıssııanyń shuǵyl keńesin ótkizdi.
«Olımpıadalyq rezerv mektebinde bolǵan bul keleńsiz jaǵdaı úlken alańdaýshylyq týdyrady. Sportshylar árqashan ózderiniń komandalyq rýhymen, álsizderdi qoldaýymen jáne kómegimen erekshelenedi. Bul mektepte, kórip otyrǵanymyzdaı, munyń bári joq. Kámeletke tolmaǵandardyń quqyqtaryn qorǵaý jónindegi komıssııanyń jumysyna resmı kózqaras ta bar. Bul onyń baqylaýsyzdyǵy men salǵyrttyǵy, bul qaıǵyly oqıǵalarǵa ákeldi. Men komıssııanyń belgili bir sheshimder qabyldaǵanyn, keıbir laýazymdy tulǵalardyń tártiptik jaýapqa tartylǵanyn bilemin. Sonymen qatar, bul jetkiliksiz dep sanaımyn», - dep túıindedi Ermek Marjyqpaev.
Kóshpeli keńes qorytyndysy boıynsha dene shynyqtyrý jáne sport basqarmasyna Bógenbaı batyr atyndaǵy olımpıadalyq rezervtiń oblystyq mamandandyrylǵan mektep-ınternat-kolledjiniń dırektory Tursynbaı Toqqojınovtyń atqaratyn laýazymyna sáıkes kelmeý máselesin qaraý tapsyryldy, al oblystyq dene shynyqtyrý jáne sport basqarmasynyń basshysy Áset Búkibaevqa fýnktsıonaldyq mindetterin tıisinshe oryndamaǵany úshin qatań sógis jarııalandy.
Dene shynyqtyrý jáne sport basqarmasynyń málimetinshe, qazirgi kezde atalǵan mektep-ınternat-kolledjiniń dırektory Tursynbaı Toqqojınov qyzmetinen shettetildi.
Sondaı-aq, Stepnogor qalasynyń ákimine áleýmettik salaǵa jetekshilik etetin, kámeletke tolmaǵandardyń isteri jáne olardyń quqyqtaryn qorǵaý jónindegi qalalyq komıssııanyń tóraǵasy bolyp tabylatyn ákimniń orynbasary Gúlnaz Ábilovany tártiptik jaýapqa tartý týraly máseleni qaraý tapsyryldy. Polıtsııa departamentine jáne prokýratýra organdaryna egjeı-tegjeıli tergeý júrgizý, barlyq kinálilerdi qoldanystaǵy zańnama sheńberinde jaýapqa tartý, aýmaqtyq qyzmettermen jasalǵan quqyq buzýshylyqtardy ýaqtyly monıtorıngileý jáne habarlaý boıynsha pysyqtaý, tergeý is-sharalaryn júrgizý kezinde zańdylyqtyń tolyq saqtalýyn baqylaýdy qamtamasyz etý tapsyryldy.
«Búgingi tańda Aqmola oblysynyń polıtsııa departamenti Qylmystyq kodekstiń 141-shi baby «Balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaý» jáne 194-shi baptyń 2-shi bóligi «Bopsalaý» boıynsha sotqa deıingi tergeýdi bastady. Sondaı-aq, kámeletke tolmaǵandarmen jumys isteýge kásibı jáne táýelsiz psıhologtar tartyldy. Atalǵan másele boıynsha keshendi tekserý jalǵasýda», - dep túıindedi ákimdikten.
Eske sala ketsek, Step News arnasynda Stepnogordegi mektep-ınternatynyń tárbıelenýshileri tómengi synyp oqýshylaryna álimjettik jasaǵan bolatyn.