Stepnogor mańynda kólik aýdarylyp, 36 jastaǵy áıel kóz jumdy
STEPNOGOR. QazAqparat - Aqmola oblysynyń «Stepnogor-Zavodskoı» tasjolynda kólik aýdarylyp, 36 jastaǵy áıel kóz jumdy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, aǵymdaǵy jylǵy qazannyń 24-de kúndizgi saǵat 12:20 shamasynda Stepnogor qalalyq polıtsııa basqarmasynyń kezekshi bólimine «Stepnogor-Zavodskoı» avtojolynyń 6 shaqyrymynda jol apaty bolǵany habarlanǵan.
Anyqtalǵandaı, Zavodskoı kenti baǵytynda júrip kele jatqan Hyundai Accent avtokóliginiń 35 jastaǵy júrgizýshisi rýldi basqara almaı, kólik aýdarylǵan.
«Saldarynan Stepnogor qalasynyń qalalyq aýrýhanasyna 36 jastaǵy jolaýshy jetkizildi, ol saǵat 21:10-da jansaqtaý bóliminde kóz jumdy. Medıtsınalyq kýálandyrý aktisine sáıkes Hyundai Accent avtokóliginiń júrgizýshisi «jeńil dárejede» mas kúıinde bolǵan. Tıisti saraptama taǵaıyndaldy», - dedi vedomstvodan.
Qazirgi kezde osy oqıǵaǵa baılanysty Qylmystyq kodekstiń 345-1 babynyń 3-bóligi «kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» boıynsha sotqa deıingi tergeý bastaldy.
