Stepnogor mańyndaǵy úsh adam mert bolǵan jol apatyna baılanysty tyń derekter anyqtaldy

KÓKShETAÝ. KAZINFORM – Stepnogor qalasy mańynda jantúrshigerlik jol apatynan úsh adamnyń qaıtys bolǵany anyqtaldy, polıtsııa is qozǵady.

Aqmola oblysy Polıtsııa departamenti baspasóz qyzmetiniń málimetinshe, naýryzdyń 23-de Stepnogor qalasynda jol qozǵalysy qaýipsizdigin qamtamasyz etý kezinde «Toıota Lend Krýzer» júrgizýshisi polıtsııanyń kólikti toqtatý týraly zańdy talabyn oryndamaǵan. 

Keıin quqyq buzýshy ózge kólikke soqtyǵysyp, oqıǵa ornynan ketip qalǵan. Osylaısha, ol azamattardyń ómirine qaýip tóndirgen.

Polıtsııa quqyq buzýshyny ustaý úshin onyń sońynan qýǵan jáne QR «Quqyq qorǵaý qyzmeti týraly» Zańynyń 59 jáne 61-baptary boıynsha kólik quralyn májbúrlep toqtatý úshin qyzmettik qarý qoldandy.

Polıtsııadan qashqan quqyq buzýshy «Zavodskaıa-Ónerkásiptik aımaq» avtojolyna shyǵyp, onda júrgizýshi men eki jolaýshysy otyrǵan «Aýdı V4» avtokóligimen soqtyǵysty. Saldarynan jeńil kólikte bolǵan úsh adam alǵan dene jaraqattarynan oqıǵa ornynda kóz jumdy.

«Jol kólik oqıǵasyna baılanysty sotqa deıingi tergeý bastaldy. Júrgizilgen medıtsınalyq kýálandyrý «Toıota Lend Krýzer» kóliginiń júrgizýshisi mas bolǵanyn kórsetti. Tergeý aıasynda sot-medıtsınalyq saraptama taǵaıyndaldy. «Toıota Lend Krýzer» avtokóliginiń júrgizýshisi ustalyp, ýaqytsha ustaý ızolıatoryna qamaldy», - dedi vedomstvodan.

Aıta ketsek, budan buryn Stepnogor qalasy mańynda jantúrshigerlik jol apaty bolǵanyn jazǵan edik.