Stepnogor qalalyq aýrýhanasyna kúrdeli jóndeý júrgiziledi
Aımaq basshysy Stepnogor qalasynda salynyp jatqan jaldamaly 45 páterli turǵyn úıdiń qurylys jumystarymen tanysty. Aımaq basshysy bes qabatty turǵyn úıdiń sapasyna kóńili tolmaıtynyn aıtyp, barlyq kemshilikterdi tez arada joıýdy jáne qurylys jumystaryn kestege saı júrgizýdi tapsyrdy.
Budan ári aımaq basshysy olımpıada rezervterin daıarlaıtyn oblystyq Bógenbaı batyr atyndaǵy mamandandyrylǵan sport mektebinde boldy. Jıyrma jyldyń ishinde atalmysh mektepten 505 túlek túlep ushqan. Onyń 248-i Qazaqstan ulttyq quramasynyń sapyna alynǵan.
«Munda aımaq basshysy sport nysannyń zaldaryn aralap kórip, jattyqtyrýshylar quramy jáne sportshylarmen kezdesti. Kezdesýde sport mektebiniń aýyr atletıka zalyna jóndeý jumystaryn júrgizý úshin 16 mıllıon teńgeniń sertıfıkatyn tartý etti», - dedi ákimdiktiń baspasóz qyzmetindegiler.
Al Stepnogor kópbeıindi qalalyq aýrýhanasyna jóndeý jumystaryn júrgizý úshin jobalyq – smetalyq qujattar ázirleýdi tapsyrdy. Búgingi kúni aýrýhana kúrdeli jóndeýdi qajet etedi. Naqtyraq aıtsaq, medıtsınalyq jabdyqtardy aýystyryp, jansaqtaý, anestezııa, ıntensıvti terapııa bólimsheleri men lıftige kúrdeli jóndeý qajet. Aýrýhana 270 kerýettik, kúndizgi stantsıonarda 37 kerýet bar.
Shahardaǵy ambýlatorlyq dıalız ortalyǵyna keletin bolsaq, medıtsınalyq mekeme memlekettik-jekeshelik seriktestik sheńberinde salynǵan. Ortalyqta búırek dertine shaldyqqan naýqastarǵa joǵary sapaly gemodıalız jáne gemodıalfıtratsııa, transplantatsııalyq kezeńde terapııa qyzmetteri usynylady. Ortalyqtyń ashylýy arqyly Aqmola oblysy turǵyndarynyń búırek aýrýlaryn emdeýde qoljetimdiligi artyp keledi.
Sonymen qatar, aımaq basshysy jeke máselelerimen kelgen stepnogorlyqtardy qabyldap, qala ákimi Erkebulan Baıahmetovtyń turǵyndar aldynda eseptik kezdesýine qatysty.
