Stenfordty baǵyndyrǵan qazaq balasy: Álıhan Serikov álemniń úzdik JOO-na qalaı tústi
ASTANA. KAZINFORM — Robototehnıkadan álem chempıonatynyń júldegeri Álıhan Serikov Qazaqstannyń atyn taǵy bir márte jahanǵa tanytty. Ol álemdegi eń bedeldi oqý oryndarynyń biri — Stanford University-diń tolyq qarjylyq grantyn jeńip aldy. Jibek Joly telearnasynyń «Búgin.LIVE» baǵdarlamasynda jas daryn bul bıikke jetý úshin 4 jyl boıy úzdiksiz daıyndalǵanyn aıtyp berdi.
Álıhan oqýǵa qabyldanǵany týraly habardy alǵash kórgende óz kózine ózi senbegen.
— Nátıje senbi kúni tańǵy 5-te shyqty. Ózime qatty senbegendikten, uıqymdy buzbaı saǵat 10-da bir-aq oıandym. Poshtany ashqanda «tústiń» degen jazýdy kórip, eseńgirep qaldym. Sene almaǵanym sonsha noýtbýkti óshirip qosyp, braýzerdi qaıta-qaıta jańarttym. Tek 5 mınýttan soń ǵana bul túsim emes, óńim ekenin túsindim, — deıdi ol.
Sarapshylardyń aıtýynsha, Stenford — álemdik reıtıngte úzdik úshtikten túspeıtin oqý orny. Munda túsý úshin tek robot qurastyrý azdyq etedi.
Álıhannyń portfolıosynda sport ta, ekonomıka da, tipti mekteptegi kóshbasshylyq tájirıbesi de bar. Ol ýnıversıtet suraǵan 650 sózdik basty esseden bólek, 8 birdeı qysqa shyǵarma jazyp shyqqan.
— Munda bir ǵana jarys nemese bir ǵana baǵyt ról oınamaıdy. Bul — búkil ómirińdegi izdenisteriń men oılaryńnyń kombınatsııasy. Men robototehnıkamen qatar bıznes-startaptarǵa qatystym, ártúrli jerlerden tájirıbe jınadym. Sondyqtan Stenfordtaǵy «Management science engineering» degen sırek mamandyqty tańdadym. Bul baǵyt bıznes, ınjenerııa jáne jasandy ıntellekt salalaryn bir arnaǵa toǵystyrady, — deıdi bolashaq stýdent.
Álıhan óziniń belsendi jolyn 9-synyptan bastaǵan. Bilim forýmdarynda shetel asqan otandastarynyń jetistigin kórip qanattansa, jasandy ıntellekt salasynda júrgen anasy oǵan baǵyt-baǵdar berip, basty motıvatoryna aınaldy.
— Bolashaqqa armanym kóp. Endigi maqsatym — ózimniń JI bastamamdy álemdik deńgeıge shyǵarý. Sáýirde Stenfordqa alǵashqy tanysý aptalyǵyna baramyn, al negizgi oqýym tamyzda bastalady, — dep túıindedi Álıhan.
Aıta keteıik, Álıhan FIRST jarystaryna qatysyp, bastapqy deńgeıdegi FIRST LEGO League kezeńinen bastap joǵary deńgeıdegi FIRST Tech Challenge sanatyna deıin jetken.
Onyń komandasy Ortalyq Azııa aımaqtyq chempıonatynda jeńiske jetip, Hıýston qalasynda ótken álemdik kezeńge joldama aldy. Álem chempıonatynyń qorytyndysy boıynsha komanda ınjenerııa, dızaın, prezentatsııa jáne qoǵammen jumys baǵyttary boıynsha beriletin Inspire Award syılyǵynyń 3-ornyn ıelengen bolatyn.
