Stend atýdan Qazaqstan quramasy jańa maýsymǵa daıyndyǵyn bastady
ASTANA. KAZINFORM - El-Kýveıt qalasynda Qazaqstan quramasynyń stend atýdan oqý-jattyǵý jıyny bastaldy.
Ulttyq olımpıadalyq komıtettiń málimetinshe, bul jıynǵa ulttyq quramanyń 42 sportshysy qatysyp jatyr.
Sportshylar tehnıkalyq qatelikterdi joıý maqsatynda zamanaýı ádistemeler men jabdyqtardy qoldana otyryp jumys isteıdi. Bul olardyń sheberlikterin arttyrýǵa kómektesedi. Jas atýshylarǵa erekshe nazar aýdarylyp, olarǵa bolashaqta damýǵa jaǵdaı jasalýda.
Baǵdarlamaǵa jarys jaǵdaıyna jaqyn oqý-jattyǵýlar da kirip, kúızeliske tózimdilikti nyǵaıtýǵa yqpal etedi. Oǵan qosa, sportshylar kúsh pen tózimdilikti damytýǵa baǵyttalǵan fızıkalyq daıyndyqtan, sondaı-aq paıdaly vıtamınder, massaj, medıtatsııa jáne monshaǵa barý syndy ońaltý sharalarynan ótedi.
Aıta keteıik, oqý-jattyǵý jıyny 13 aqpanǵa deıin jalǵasady.
Buǵan deıin Qytaıda ótip jatqan Qysqy Azııa oıyndarynda shaıbaly hokkeıden Qazaqstan áıelder quramasy Gonkongty oısyrata jeńgenin habarlaǵan edik.