Stend atýdan álem chempıonatynda Qazaqstan quramasy altyn medal jeńip aldy

Bizdiń komanda áıelder arasyndaǵy komandalyq trap saıysynda júldege qol jetkizdi. Fınalda qazaqstandyq mergender 337 upaı jınady.

Álem chempıonatynyń jeńimpazdary atanǵan sportshylar – Eleonora Ibragımova, Marııa Gorýn jáne Mılana Papchıhına.

Ekinshi oryndy Italııa quramasynyń ókilderi Valentına Archettı, Stella Pıatstsa jáne Martına Montanı ıelendi. Olardyń nátıjesi – 335 upaı. Beıtarap tý astynda óner kórsetken Reseı quramasy úshinshi orynǵa turaqtady. Dara Chýpına, Ksenııa Stepına jáne Ksenııa Tatarınova 334 upaı jınap, qola medal enshiledi.

Aıta keteıik, Qazaqstan quramasynyń qorjynynda jastar arasyndaǵy álem chempıonatynyń eki medali bar. Buǵan deıin nysana kózdeýden Rınat Kazachenko úsh qalyptan shaǵyn kalıbrli vıntovkamen atý baǵdarlamasynda kúmis júldeger atanǵan bolatyn. 

Eske salsaq ıÝlııa Lı maýntınbaıktan Azııa chempıonatynda qola júlde jeńip aldy.