«Stajırovka» – kásipkerlerdiń jastarǵa jasap jatqan qııanaty – zańger pikiri
ASTANA. KAZINFORM – Qazaqstan Respýblıkasynda tájirıbeden ótý degen zań joq. Jumysqa ornalasar aldyn azamattarǵa tegin jumys istetý – zańsyz. Jibek Joly arnasynyń «Búgin LIVE» stýdııasyna qonaq bolǵan zańger dál osyndaı pikir bildirdi.
– Qazaqstan Respýblıkasynda tájirıbeden ótý degen zań múlde joq. Eshkimniń sizderdi teginnen tegin tájirıbeden ótkizýge quqyǵy joq. Bul – sizderdiń jumystaryńyzdy tegin paıdalaný. Eger sizge kásipker «mende 2 kún tájirıbeden ótesiz» dese, sol 2 kún úshin de aqy tólenýi kerek. Eger siz tájirıbeden ótken ýaqytyńyzǵa aqy almasańyz, sotqa aryz berip, sol jumysqa jumsaǵan ýaqytyńyzdyń aqshasyn óndirip ala alasyz, – deıdi Gúlaıym Antaeva.
Zańger óz praktıkasynda kezdesken zańbuzýshylyqtardyń birin aıtyp berdi.
– Meniń praktıkamda kezdesken jaǵdaı boıynsha bir otbasy demalys aımaǵynda 3 aı boıy jumys istegen. Keıin olardy jumystan qýyp shyǵyp, «sizder munda tegin turdyńyzdar» dep aıtqan. Eger sizder jumys isteseńizder, mindetti túrde istegen jumystaryńyzǵa qatysty dálel jınańyzdar. Sotta foto-vıdeo dálelder qajet bolady. Sol másele boıynsha biz sotqa shaǵymdanyp, 3 aılyq jalaqysynan bólek, ústem aqy da aldyq. Árıne, bul óte qıyn. Biraq nátıjesi bolady, – deıdi maman.
Stýdııa qonaǵy eńbek kelisimshartynsyz jumys isteıtin stýdentterge de qulaqqaǵys jasady.
– Qurmetti stýdentter! «Stajırovka» degen sózdi estiseńizder, barmańyzdar. Óıtkeni sizder keliskennen keıin ǵana kásipkerler osyndaı zańsyzdyqqa barady. Kelisimshart bolmaǵan soń jumys istegenińdi dáleldeı almaısyń. Kásipkerler de muny bilip alǵan. Jumysqa kirseńizder, mindetti túrde foto-vıdeo fıksatsııa jasap otyryńyzdar. Kelisimshart bolmaǵannyń ózinde, WhatsApp arqyly sóılesken áńgimelerińiz de sotta dálel bola alady, – deıdi ol.
Gúlaıym Antaeva kásipkerlerdiń eshqandaı azamattyń ýaqyty men resýrsyn tegin paıdalanýǵa quqyǵy joq ekenin eskertti.
– Kez kelgen tájirıbege aqy tóleý kerek. Bizdiń kásipkerler 3 kún bir stýdentti, taǵy 3 kún kelesi stýdentti tegin jumsap, jaman úırengen. Olar jumysshyǵa: «Sen 3 kún tájirıbeden ótesiń, biraq resmı jumysyńa 10 myń teńge alatyn bolsań, tájirıbeden ótken ýaqytyńa 5 myń teńge tóleımiz. Eger jumysyń bizge unasa, biz senimen eńbek kelisimshartyn jasaımyz. Ary qaraı tolyq jalaqy alasyń», – dep aıtýy kerek. Adamnyń ýaqyty men resýrsyn eshkim tegin paıdalanbaýy kerek. Ol kisi tań atpaı turady. Jumysqa kelip-ketý úshin de shyǵyndalady. Bul – kásipkerlerdiń jastarǵa jasap jatqan qııanaty! – deıdi zańger.
Maman mundaı zań buzýshylyqtardy tekserýge eńbek ınspektsııasynyń quzyreti joq ekenin jetkizdi.
– Mundaı dúnıelerdi tekserýge eńbek ınspektsııasynyń quzyreti joq. Óıtkeni bul aıǵaqtarǵa sot qana quqyqtyq baǵa bere alady. Aýyzsha kelisimsharttyń ózi kelisimshart retinde esepteledi. Al eńbek ınspektsııasy aýyzsha kelisimsharttardy qaramaıdy. Siz jumys berýshige jalaqyny bermese, sotqa baratynyńyzdy aıtasyz. Ol sonda da bas tartsa, barlyq aıǵaq, dálelder sotta qaralyp, quqyqtyq baǵa beredi. Barlyǵy dáleldense, kelisimshart boıynsha jalaqy tóleýge mindetteıdi. Al basqa organdar eshqandaı azamatty eshteńege mindetteı almaıdy, – deıdi Gúlaıym Antaeva.
Al jumys berýshi aryz jazýǵa májbúrlese, jumysshy óz quqyǵyn qalaı qorǵaıdy? Bilgińiz kelse, siltemege ótińiz.