Stavropolda bolǵan jarylystyń qurbandary kóbeıýde
ASTANA. Mamyrdyń 27-si. QazAqparat - Sońǵy málimetter boıynsha, Reseıdiń Stavropol qalasynda bolǵan jarylystan eń kem degende 50 adam zardap shegip otyr.
Buǵan deıingi aqparattarda 45 zardap shegýshi týraly aıtylǵan bolatyn. Al qaza bolǵandardyń sany 6 adamǵa jetti, dep habarlaıdy RBK agenttigi.
Mamyrdyń 26-sy kúni saǵat 18.45-te Stavropol Mádenıet jáne sport saraıyna japsarlas ornalasqan ǵımaratta jarylys boldy. Aldyn ala málimetter boıynsha, onyń qýaty 250 gramm trotılge teń. Jarylys «Vaınah-Kavkaz ańyzy» memlekettik bı ansambliniń kontsertine 15 mınýt qalǵanda bolyp otyr.
Osy oqıǵaǵa baılanysty RF Qylmystyq kodeksiniń 105-baby 2-tarmaǵy (jalpyǵa qaýipti tásilmen jasalǵan eki jáne odan da kóp adamdy óltirý), 222-baptyń 2-tarmaǵy (jarylǵysh zattardyń zańsyz aınalymy) jáne 205-baby (lańkestik áreket) boıynsha qylmystyq is qozǵalyp otyr.
