Statsıonarlardyń medıtsınalyq qyzmetterge arnalǵan tarıfteri qaıta qaralady — DSM
ASTANA. KAZINFORM — Eki jyl ishinde statsıonarlardyń medıtsınalyq qyzmetterge arnalǵan tarıfteri qaıta qaralady. Bul týraly búgin Úkimet otyrysynda Densaýlyq saqtaý mınıstri Aqmaral Álnazarova aıtty.
— 2025-2026 jyldary statsıonarlardyń medıtsınalyq qyzmetterge arnalǵan tarıfterin tolyǵymen qaıta qaraý josparlanyp otyr. Bul qarajattyń ádil bólinýin jáne zamanaýı tehnologııalardyń tájirıbege engizilýin qamtamasyz etedi, — dedi mınıstr.
Onyń atap ótýinshe, densaýlyq saqtaý uıymdarynyń qarjylyq turaqtylyǵyn qamtamasyz etý jáne olardyń eńbegine ádil aqy tóleý úshin tarıftik saıasat transformatsııalandy.
Statsıonarlyq kómekke aqy tóleýdiń negizi sanalatyn 426 klınıkalyq shyǵyndy top tolyǵymen qaıta qaraldy.
— Іske asyrylyp jatqan sharalar belgili bir rezervti qalyptastyrýǵa, 2026 jyldan bastap tarıfterdi ulǵaıtýǵa, 7 terapııalyq jáne 2 hırýrgııalyq beıinder boıynsha qoljetimdilikti arttyrýǵa baǵyttalatyn qarajatty qarastyrýǵa múmkindik berdi. Mysaly, 2024 jyly ishki rezervter esebinen 72 statsıonarlyq qyzmet boıynsha tarıfter 23 mlrd teńgege ulǵaıdy. Jańa tarıfter balalar aýrýhanalary men perzenthanalardyń basym kópshiliginiń qyzmet sapasyn jaqsartýǵa múmkindik berdi. Bul ana men bala ólimin tarıhı tómen kórsetkishterge jetkizýge jáne olardyń kredıtorlyq bereshekten shyǵýyna yqpal etti, — dedi Aqmaral Álnazarova.
Aıta keteıik, Úkimet otyrysynda Premer-mınıstr Oljas Bektenov medıtsınalyq kómek kórsetý standarttary men erejelerin qaıta qaraý kerektigin aıtty.