Statıstıkaǵa qoldan qosylǵan 5 mln bas malǵa eshqandaı sýbsıdııa tólengen joq — AShM
ASTANA. KAZINFORM — Aýyl sharýashylyǵy mınıstrligi Kazinform saýalyna bergen jaýapta resmı statıstıkaǵa qoldan qosylǵan, qujatta ǵana bolǵan 5 mln basqa bıýdjetten eshqandaı sýbsıdııa tólenbegenin málim etti.
Eske salsaq, Prezıdent Qasym-Jomart Toqaev bıylǵy Joldaýynda resmı statıstıkadaǵy 3 mln bas usaq mal men 2 mln iri qaranyń qaǵazda bar, ómirde joq ekenin ataǵan edi.
Aýyl sharýashylyǵy mınıstrligindegiler bul maldyń qazir esepten shyǵarylǵanyn, olardyń eshbirine memleketten sýbsıdııa berilmegenin aıtyp otyr.
«QR Premer-Mınıstriniń orynbasary Serik Jumanǵarın jergilikti atqarýshy organdarǵa qatysty tártiptik sıpattaǵy sharalar men ákimshilik jaýapkershilik sharalaryn qoldanbaı statıstıkalyq derekterdi nólden bastaýdy tapsyrdy. Osy tapsyrmany oryndaý úshin respýblıkalyq arnaıy jumys toby quryldy. Nátıjesinde mal sharýashylyǵynda shamamen 2 mln iri qara mal, 3 mln astam usaq mal basy, 3 mln tonna sút esepten shyǵaryldy. Ósimdik sharýashylyǵynda jumys jalǵasyp jatyr. Bul rette esepten shyǵarylǵan mal basy sýbsıdııa alýshylar bolyp tabylmaıtyn jeke qosalqy sharýashylyqtarǵa tıesili ekenin atap ótken jón», — dep jazylǵan mınıstrlik jaýabynda.
