Statıstıka: Turǵyn úı-kommýnaldyq qyzmetterdiń jaqsy sapasyna razylar - aqtóbelikter
QR Statıstıka agenttiginiń málimetinshe, úı sharýashylyqtaryn iriktep zertteý qorytyndylary boıynsha (sýbektıvti baǵalaý) 2012 jylǵy 1 qańtarda ótken jylmen salystyrǵanda Qazaqstan Respýblıkasynda kórsetilgen kommýnaldyq qyzmetterdiń sapasy 1,8 paıyzdyq tarmaqqa jaqsarǵandyǵy baıqalady.
Qyzmetterdiń jaqsy sapasyn qalalyq jerlerdegi úı sharýashylyqtarynyń - 63,3 paıyzy, aýyldyq jerlerdegi úı sharýashylyqtarynyń - 58,6 paıyzy kórsetedi, sonymen qatar ótken jylǵa qaraǵanda 0,8 jáne 6,5 paıyzdyq tarmaqqa sáıkesinshe ósken.
Zertteý derekteri boıynsha kórsetilgen TKSh qyzmetteriniń jaqsy sapasyn atap kórsetken tutynýshylardyń eń kóp úlesi Aqtóbe (85,5 paıyz) jáne Pavlodar (79,1 paıyz) oblystarynda, eń az úlesi - Aqmola oblysynda (48,8 paıyz), Astana qalasynda (45,6 paıyz) jáne Almaty oblysynda (45,0 paıyzy).
Turǵyn úı-kommýnaldyq qyzmetterdiń sapasyn olardyń túrleri boıynsha baǵalaýda esepti kezeńde ótken jylmen salystyrǵanda kórsetilgen TKSh qyzmetteriniń sapasynyń jaqsarýy baıqalady. Sonymen qatar, aýyzsýdyń jaqsy sapasyn atap kórsetken úı sharýashylyqtarynyń úlesi 6,9 paıyzdyq tarmaqqa, elektr júıesiniń qýaty - 3,3 paıyzdyq tarmaqqa, ystyq sý qysymy - 2 paıyzdyq tarmaqqa, jylytý temperatýrasy - 1,6 paıyzdyq tarmaqqa ósti. TKSh qyzmetteriniń nashar sapasyn atap kórsetken úı sharýashylyqtarynyń úlesi gaz berý jáne qoqys shyǵarý boıynsha tómendedi.
Kommýnaldyq qyzmettermen qamtamasyz etýdegi kidiristerge narazylyq bildirý deńgeıi boıynsha tutynýshylardyń 12,5 paıyz - «jıi», 7,5 paıyz - «óte jıi», 80,0 paıyz - «sırek» degen baǵa berdi. Sonymen birge, kidiristerge narazylyq tanytqan tutynýshylardyń eń kóp sany Atyraý (22,5 paıyz) jáne Aqmola (13,0 paıyz) oblystarynda, kidiristerge narazylyq tanytqan tutynýshylardyń eń az sany Aqtóbe oblysynda baıqaldy.
