Statıstıka salasyna jańa uǵymdar engizilip jatyr
ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine memlekettik statıstıka máseleleri boıynsha ózgerister men tolyqtyrýlar engizý týraly» zań jobasyn maquldady, dep habarlaıdy QazAqparat.
«Atalǵan Zań jobasy memlekettik statıstıka salasyndaǵy quqyqtyq retteýdi odan ári jetildirýge baǵyttalǵan. Zań jobasyn daıyndaý kezinde Germanııa, Fınlıandııa, Ońtústik Koreıa, Avstrııa, Italııa jáne taǵy basqa damyǵan elderdiń tájirıbesi zertteldi. Qujat Resmı statıstıka týraly eýropalyq modeldik zań erejeleriniń negizinde daıyndaldy. Sondaı-aq, 2017 jyly halyqaralyq ınstıtýttar júrgizgen Qazaqstannyń ulttyq statıstıka júıesin jahandyq baǵalaýdyń usynymdary da eskerildi. Zań jobasynyń negizgi maqsaty - halyqaralyq tájirıbeni, standarttar men qaǵıdattardy eskere otyryp, ınstıtýtsıonaldyq orta men statıstıkalyq júıeni, operatsııalyq qamtamasyz etýdi odan ári jetildirý», - dedi QR Ulttyq ekonomıka mınıstri Tımýr Súleımenov.
Atap aıtqanda, zań jobasymen Qazaqstan Respýblıkasynyń 2 zańnamalyq aktisine túzetýler engiziledi. «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Zańǵa sharýashylyq boıynsha esepke alýdy júrgizý jóninde naqtylaýlar engizildi. «Memlekettik statıstıka týraly» Zańǵa uǵymdyq bóligin naqtylaý eskerilgen. Osy oraıda «ákimshilik derekter», «ulttyq sanaq» sekildi uǵymdardy naqtylaý jáne keńeıtý kózdeledi. Sondaı-aq «ıntervıýer», «metaderekter», «telefon arqyly saýal júrgizýdiń kompıýterlendirilgen júıesi (TSJKJ)», «baǵany tirkeý» jáne taǵy basqa da birqatar jańa uǵymdar engizilip otyr.
Munymen qosa, ulttyq sanaqtardy júrgizý boıynsha is-sharalar josparyn bekitý jónindegi Úkimettiń quzyreti bekitiledi.
