Statıstıka komıteti Qazaqstan halqynyń naqty qansha bolǵanyn aıtty
ASTANA. QazAqparat - 2014 jyldyń 1 tamyzyndaǵy derekter boıynsha elimizdegi halyq sany 17 308,7 myń adamdy qurady, sonyń ishinde qalalyqtar - 9 541,8 myń (55,1%), aýyldyqtar - 7 766,9 myń adamdy (44,9%) qurady. Bul derekterdi búgin ótken brıfıngte QR Ulttyq ekonomıka mınıstrligi Statıstıka komıtetiniń tóraǵasy Álıhan Smaıylov keltirdi.
Onyń málimetinshe, 2014 jylǵy qańtar-shildede jalpy elimizde halyq sany 147,9 myń adamǵa nemese 0,9%-ǵa ósti, 2013 jylǵy 1 tamyzben salystyrǵanda halyq sany 255,2 myń adamǵa nemese 1,5%-ǵa ósken. «AHAT organdary usynǵan azamattyq hal aktilerin tirkeý jazbalaryndaǵy málimetterdi óńdeý nátıjesinde, 2014 jylǵy qańtar-shilde aılarynda týylǵan balalar sany 231,4 myńdy qurap, 2013 jylǵy osy kezeńge qaraǵanda 4,4 myńǵa nemese 1,9%-ǵa artty. Týýdyń jalpy koeffıtsıenti 1000 adamǵa 23,04 týylǵandardy qurady», - dep atap ótti Á. Smaıylov. Tóraǵanyń aıtýynsha, qarastyrylyp otyrǵan kezeńde qaıtys bolǵandar sany 78,6 myń adamdy qurap, 2013 jylǵy qańtar-shildege qaraǵanda 4 myń adamǵa nemese 4,8%-ǵa azaıǵan.
