Statıstıka boıynsha sýǵa batý qaıǵyly oqıǵalarynyń 99,9 paıyzy elimizdiń jabdyqtalmaǵan sý qoımalaryna tıesili - QR TJM
ASTANA. 23 shilde. QazAqparat - Bıylǵy jarty jylda 6 aıda elimizdiń sý aıdyndarynda 513 adam, onyń ishinde 141 bala zardap shekti. Mınıstrliktiń sýda qutqarý qyzmetiniń qutqarýshylary sonyń ishinde 349 adamdy (onyń ishinde 112 balany) qutqardy. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Tótenshe jaǵdaılar mınıstri Vladımır Bojko málim etti.
Jalpy atalǵan merzimde 164 adam, onyń ishinde 29 bala sýǵa ketti.
«Júrgizilgen sapaly aldyn alý-profılaktıkalyq jumystyń arqasynda 2012 jyldyń uqsas kezeńimen salystyrǵanda elimizdiń sý aıdyndarynda zardap shekkenderdiń sany 48 paıyzǵa, al sýǵa ketkenderdiń sany 32 paıyzǵa azaıdy. Statıstıka oqys oqıǵalardyń 99,9 paıyzy elimizdiń jabdyqtalmaǵan sý aıdyndarynda bolatynyn kórsetedi. Qazirgi ýaqytta elimizde 348 resmı sýǵa túsý orny (onyń ishinde 116 balalar jaǵajaılary) jumys isteıdi», - deıdi mınıstr.
Elimizdiń sý aıdyndarda adamdar qaza bolýyna negizinen júze bilmeý jáne óz kúshterin jete baǵalamaý (78 oqıǵa, sýǵa ketkenderdiń jalpy sanynyń 48%-y), mas kúıinde sýǵa shomylý (57 oqıǵa, sýǵa ketkenderdiń jalpy sanynyń 35%-y), balalardyń eresek adamdardyń qaraýynsyz sý aıdyndarynyń mańynda júrýi (29 oqıǵa, sýǵa ketkenderdiń jalpy sanynyń 17%-y) sebepti.
