Statıstıka agenttiginiń burynǵy tóraıymy A. Meshimbaevany Qazaqstan BAÁ-den ekstradıtsııalaý úderisin shapshańdatýǵa nıetti -I. Merkel
ASTANA. 4 qazan. QazAqparat -Statıstıka agenttiginiń burynǵy tóraıymy A. Meshimbaevany Qazaqstan Birikken Arab Ámirlikterinen ekstradıtsııalaý úderisin shapshańdatýǵa nıetti.
Búgin Parlament Senatynda ótken jalpy otyrystan soń jýrnalısterge bergen suhbatynda QR bas Prokýrorynyń birinshi orynbasary Iogan Merkel osylaı málim etti.
«Jaqyn kúnderi biz Syrtqy ister mınıstriniń orynbasary deńgeıinde Arab Ámirligine memlekettik sapar jasap qalýymyz ábden múmkin. Sonymen qatar, elimizdiń bas prokýrory nemese onyń orynbasarlarynyń biri de sol saparǵa birge barýy múmkin. Degenmen, bunyń qalaı jáne qashan bolatynyn naqty aıta almaımyn, alaıda Arab Ámirlikterine sapar mindetti túrde bolady. Óıtkeni, osy elde qazirgi kúni bizdiń onshaqty azamattarymyz júr. Olar baıaǵy tenderlerge qatysty delinetin sheneýnikter, bıznesmender», - dedi I. Merkel.
Sonymen qatar, Bas prokýrordyń orynbasary izdeýde júrgen A. Meshimbaevanyń áli kúnge Birikken Arab Ámirlikterinde júrgenin naqtylady. «Biz ony qaıtarý úderisin shapshańdatqymyz keledi. Óıtkeni, qylmystyq ister áli jatyr, ádildik qaǵıdatyna salsaq, ol ister jatpaı sotqa joldanýy kerek edi», - dedi I. Merkel.
Eske sala keteıik, búgin QR Parlamenti Senatynyń jalpy otyrysynda «Qazaqstan Respýblıkasy men Iran Islam Respýblıkasy arasyndaǵy ustap berý týraly shartty ratıfıkatsııalaý týraly» jáne «Qazaqstan Respýblıkasy men Ispanııa Koroldigi arasyndaǵy Qylmystyq ister boıynsha ózara quqyqtyq kómek týraly konventsııany ratıfıkatsııalaý týraly» zańdary qabyldandy.
