Statıstıka agenttigi múgedekterge qatysty áleýmettik zertteýdiń 2 jańa ádisin engizdi
ASTANA. QazAqparat - QR Prezıdentiniń tapsyrmalaryn oryndaý barysynda Statıstıka agenttigi áleýmettik zertteýdiń 2 jańa ádisin engizdi. Bul týraly búgin Ortalyq kommýnıkatsııalar qyzmetinde ótken brıfıngte QR Statıstıka agenttiginiń tóraǵasy Álıhan Smaıylov málim etti.
Onyń aıtýynsha, múmkindigi shekteýli jandardy jumyspen qamtý jáne olar úshin qoljetimdi ınfraqurylymdar jasaý jónindegi Memleket basshysynyń tapsyrmasyn oryndaý aıasynda Statıstıka agenttigi 2014 jyly genderlik erekshelikti eskere otyryp, eresekter men balalarǵa arnalǵan jeke zertteýdiń 2 jańa ádisin qoldanysqa engizdi.
«Bul zertteýdiń nátıjesinde múmkindigi shekteýli jandardyń qazirgi jaǵdaıyn kórsetetin, túrli problemalarǵa tap bolǵan adamdardy anyqtaýǵa múmkindik beretin jáne áleýmettik saıasattyń osy salasynda sheshimder qabyldaýǵa negiz bolatyn málimetter alynady», - dedi Á. Smaıylov.
