Statı isi: Daýǵa núkte qoıyldy

ASTANA. KAZINFORM – QR Úkimeti, Qazaqstan Ulttyq Banki jáne Statı tarapy Tristan Oil jetekshi kredıtorlarynyń qoldaýymen jáne kelisimimen uzaq ýaqytqa sozylǵan Qazaqstandaǵy munaı-gaz aktıvterine qatysty daýdy bitimgershilik jáne ózara qolaıly sheshý úshin zańdy kúshi bar negizdik kelisimge qol qoıdy.

QR Ádilet mınıstrliginiń baspasóz qyzmetiniń málimetinshe, taraptar barlyq sot protsesin jáne barlyq ıýrısdıktsııalarda jalǵasyp jatqan talaptardy toqtatý boıynsha kelisimge kelgen. Kelisimniń naqty sharttary qupııa bolyp sanalady.

«Biz negizdemelik kelisimdi qoldaımyz jáne Prezıdent Qasym-Jomart Toqaevtyń jarqyn reformalary aıasynda Ádiletti Qazaqstandy qurý týraly sheshimin quptaımyz. Bul daýdyń sheshilýi Qazaqstannyń halyqaralyq sharttyq mindettemelerdi saqtaýyn kórsetedi, ınvestıtsııa kólemin arttyrýǵa jol ashady jáne onyń ekonomıkalyq ósý áleýetin arttyrady. «Biz Qazaqstannyń jańa dáýirin quptaımyz», - dedi Argentem Creek Partners bas dırektory Denıel Chapman.

QR Ádilet mınıstri Azamat Esqaraev atap ótkendeı, kelisim qoǵamdyq múddeni eskere otyryp qabyldanǵan jáne bıýdjet qarajatynyń jumsalýyn kózdemeıdi.

«Biz bul qadam elimizge jańa ınvestıtsııa tartýǵa jáne ekonomıkanyń ósýine oń áserin tıgizedi dep oılaımyz», - dedi ol.

Aıta keteıik, Argentem Creek Partners — Stati Parties ınvestıtsııalyq quraly bolyp tabylatyn Tristan Oil Limited kompanııasyna nesıe berýshi bolyp tabylatyn arnaıy qorlardyń ınvestıtsııalyq menedjeri.

Esterińizge salsaq, buǵan deıin Qazaqstannyń Statımen sottasýǵa qansha aqsha jumsaǵany beımálim kúıinde qalǵanyn jazǵan edik.