«Startup «Bolashak» baıqaýynyń II maýsymynyń syılyqtar qory 30 mln teńgeden asady

ASTANA. QazAqparat - «Bolashaq» qaýymdastyǵy «Damý» qorymen birlesip isin jańa ashqan kásipkerler bıznes-jobalarynyń respýblıkalyq baıqaýynyń ekinshi maýsymy ashylǵany týraly jarııalady.

«Startup «Bolashak» baıqaýynyń II maýsymynyń syılyqtar qory 30 mln teńgeden asady.

«Bolashaq» qaýymdastyǵynyń baspasóz qyzmetinen habarlaǵandaı, baıqaýǵa Qazaqstannyń túkpir-túkpirinen jasy 18-den 29-ǵa deıingi  jastar qatysa alady. 

Startap jobalarynyń baıqaýynda I-oryn úshin - 7 mln teńge, II-oryn úshin - 6 mln teńge jáne ІІІ-oryn úshin 5 mln teńge kóleminde beriletin «Bolashaq» qaýymdastyǵynyń 3 granty  qarastyrylǵan. Sonymen qatar, Birikken Ulttar Uıymynyń Qazaqstan Respýblıkasyndaǵy Damý baǵdarlamasy «jasyl ekonomıka» salasyndaǵy startaptardy iske asyrý úshin bólgen qarjysy aıasynda 15 mln teńge grant beredi.

Budan bólek, qyzyqty ıdeıalardyń avtorlary ınvestorlardan ınvestıtsııa jáne «Damý» qorynan qoldaý ala alatyn bolady. 

Baıqaýǵa qatysýǵa arnalǵan ótinishter 23 qyrkúıekke deıin (qosa alǵanda) qabyldanady. «Damý» qorynyń barlyq óńirlerde kásipkerler úshin ashylǵan qyzmet kórsetý ortalyqtary qujattardy qabyldaıdy. Jeńimpazdar qarashanyń 26-sy ótetin Bıznes-josparlar marafonynda anyqtalady.