Startaptar báıgesinde qazaqstandyq qosymsha 25 myń dollar jeńip aldy
ASTANA. QazAqparat - Qazaqstandyq «Wipon» atty mobıldik qosymsha startaptar báıgesinde 25 myń dollar jeńip aldy. Baıqaý TechConnect Astana halyqaralyq tehnologııalyq konferentsııasy aıasynda ótti.
Bul dodaǵa qatysqan 300-den astam úmitkerden 10 fınalıst irikteldi. 25 myń dollar kólemindegi syıaqyny Cross Border Angels halyqaralyq ınvestorlar júıesi usyndy. Wipon - jalǵan taýarlardy paıdalanýdan saqtaıdy jáne qaýipsizdikti qorǵaýǵa septigin tıgizetin tuǵyrnama. Atap aıtqanda, iOS-qosymshasy kómegimen Wipon tutynýshylarǵa taýardyń túpnusqalylyǵyn anyqtaýǵa múmkindik beredi. Mobıldik qosymsha arqyly tutynýshy taýardyń qaptamasyndaǵy shtrıh-kodty nemese biregeı kodty skanerlep, ónimniń túpnusqalylyǵyn anyqtaı alady. Tuǵyrnama avtorlary Wipon elimizdegi kóleńkeli ekonomıkamen kúresýge eleýli paıdasyn tıgizetindigin alǵa tartýda.
