Startap jobalar boıynsha Qazaqstan jaqsy qarqyn aldy - sarapshy
ASTANA. KAZINFORM – Kazinform agenttiginiń BIZDIÑ ORTA podkasynda otandyq IT mamandar Qazaqstandaǵy startaptardy qoldaý deńgeıine baǵa berdi.
- Erterekte tıisti ekojúıeniń bolmaýynan bizde startaptar baıaý damydy. Máselen, 2015 jyly shetelde startaptarǵa ınvestıtsııa kóptep tartyldy. Al Qazaqstanda Astana Hub paıda bolǵaly jáne Almatyda Most IT Hub ashylǵaly startaptardyń úlesi kúrt artty. Astana Hub-ta ınvestıtsııa tartý úshin áleýeti joǵary jobalardy tanystyrý múmkindigi mol. Jalpy, keıingi jyldardaǵy bastamalardyń arqasynda Qazaqstanda, Ortalyq Azııada jaqsy nátıje beretin startaptar jaqynda arada kóbeıedi dep sanaımyn, - dedi SHAI startapynyń negizin qalaýshy Álibek Polatov.
Óz kezeginde SmarTestPrep jobasynyń negizin qalaýshylardyń biri Meıram Jardaevtyń paıymynsha, startap jobalardy júzege asyrý baǵytynda Qazaqstan jaqsy qarqynmen damyp keledi.
- Biz eshkimnen qalys kele jatqan joqpyz. Alpaýyt elderde bul salaǵa burynnan ekpin qoıyp keledi. Táýelsizdik alǵanymyzǵa da sonshalyqty kóp ýaqyt bolmady. Meniń oıymsha, 2035 jylǵa deıin IT salada edáýir nátıje bolady. Atap aıtqanda, Qazaqstanda ekojúıe jaqsy damyp jatyr, ıaǵnı jaqsy múmkindikter barshylyq. Astana Hub-ta, Nazarbaev Ýnıversıtetinde jaqsy jaǵdaılar jasalǵan, sondaı-aq Almaty da biraz baǵdarlamalar bar. Stýdentter men jas mamandardyń startaptaryn qoldaýǵa erekshe mán berilgen. Qazaqstannyń E-gov júıesiniń ózi sheteldiń birazyn tańǵaldyrǵan. Smarfonǵa júktegen osy bir qosymsha arqyly birqatar qyzmetti alýǵa bolady. Odan bólek, bizde kúndelikti paıdalanyp júrgen biraz ozyq platforma bar. Sondyqtan tsıfrlandyrý jaǵynan Qazaqstan óte jaqsy orynda, - dedi M.Jardaev.
Eske salsaq, bıyl sáýir aıynda Parlament Májilisinde Astana Hub pen Innovatsııalyq tehnologııalar parkin biriktirý týraly zań jobasy birinshi oqylymda talqylandy. Sol kezde Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Astana Hub-tan qoldaý kórip, halyqaralyq naryqqa shyqqan ınnovatsııalyq startaptardyń qazirgi jaı-kúıine toqtaldy.