Starmer úkimeti zeınetkerlerge qysqy jylý járdemaqysyn qaıta tóleıtin boldy

ASTANA. KAZINFORM — Ulybrıtanııada bılikke kelgen Starmer úkimeti zeınetkerlerge qysqy maýsymda tólenetin jylý járdemaqysyn qaıta engizýdi josparlap otyr, dep BBC jazdy.

Alaıda, bul kómek burynǵydaı barlyq zeınetkerlerge berile me, álde tek jeńildetilgen sharttarmen berile me — ázirge naqty emes. Starmer bul máseleniń kúzde, úkimet jańa bıýdjet jobasyn jarııalaǵan kezde naqtylanatynyn aıtty.

Jyl saıyn qarasha nemese jeltoqsan aılarynda brıtandyq zeınetkerlerge qys mezgilinde elektr qýaty men gaz úshin artatyn shyǵyndardy óteýge kómektesý maqsatynda arnaıy tólem beriledi.

Bul járdemaqy:

• 80 jasqa deıingi zeınetkerlerge — 200 fýnt sterlıng (qazirgi baǵammen shamamen 269 AQSh dollary),
• 80 jastan asqandarǵa — 300 fýnt sterlıng kóleminde beriledi.

Atalǵan kómek alǵash ret 1997 jyly Tonı Bler basqarǵan leıborıstik úkimet tusynda engizilgen bolatyn jáne ótken jylǵa deıin barlyq zeınetkerlerge tabysyna qaramastan turaqty túrde tólenip kelgen.

Alaıda, ótken jazda bılikke kelgen Starmer úkimeti alǵashqy sheshimderiniń biri retinde bul tólemdi eń muqtaj degen zeınetkerlerge ǵana berýdi uıǵarǵan edi. Ótken qysta 9 mıllıonnan astam adam bul kómekten qaǵyldy.

Úkimet bul qadam arqyly konservatorlardan qalǵan bıýdjettiń aýyr jaǵdaıyn kórsetkisi kelgenimen, sheshim halyq arasynda óte teris pikirge ıe boldy.

Mamyr aıynda ótken jergilikti saılaýlarda leıborıst kandıdattar naýqan kezinde eń jıi aıtylǵan shaǵym – qysqy tólemniń toqtatylýy bolǵanyn málimdedi. Bul saılaýda leıborıster sátsiz nátıjege tap boldy.

Eske sala keteıik, buǵan deıin Ulybrıtanııada mıgranttarǵa qarsy reforma jarııalanǵanyn jazǵan edik.