Starmer men Tramp Ormýz buǵazyn ashýdyń mańyzdylyǵyn moıyndady
ASTANA. KAZINFORM — Ulybrıtanııa premer-mınıstri Kır Starmer AQSh prezıdenti Donald Tramppen Ormýz buǵazyn keme qatynasy úshin ashýdyń mańyzdylyǵyn talqylady, dep habarlaıdy TASS.
— Kóshbasshylar Taıaý Shyǵystaǵy qazirgi jaǵdaıdy, atap aıtqanda, álemdik keme qatynasyn qalpyna keltirý úshin Ormýz buǵazyn ashý qajettigin talqylady, — delingen Ulybrıtanııa premer-mınıstri keńsesi taratqan Aq Úımen jeksenbilik telefon áńgimesiniń qorytyndysy boıynsha kommıýnıkede.
Olar Ormýz buǵazyn ashý jahandyq energetıkalyq naryqtaǵy turaqtylyqty qamtamasyz etý úshin asa mańyzdy degen pikirge keldi.
28 aqpanda AQSh pen Izraıl Iranǵa qarsy áskerı operatsııa bastady. Soqqylar iri qalalarǵa, sonyń ishinde Tegeranǵa jasaldy. Irannyń Islam revolıýtsııasy saqshylar korpýsy (KSIR) aýqymdy jaýap operatsııasyn bastap, Izraılge shabýyl jasady. Sondaı-aq AQSh-tyń Bahreın, Iordanııa, Qatar, Kýveıt, BAÁ jáne Saýd Arabııasyndaǵy nysandaryna soqqy berildi. 11 naýryzda Iran qarýly kúshteriniń ortalyq shtaby «Hatam ál-Anbııa» ókili Iran AQSh pen onyń odaqtastaryna qatysy bar munaı júkterin Ormýz buǵazy arqyly ótkizýge jol bermeıtinin málimdedi. 15 naýryzda ol Tegeran qarsylasyn tize búktirý úshin kez kelgen ádisti, sonyń ishinde Ormýz buǵazyndaǵy keme qozǵalysyn baqylaýdy qoldanatynyn aıtty.
2026 jylǵy mamyr aıynda jetkiziletin Brent markaly munaı fıýchersiniń baǵasy juma kúni Londondaǵy ICE bırjasynda barreline 110 dollardan asty. Buǵan deıin amerıkalyq Goldman Sachs banki jetkizilimdegi irkilister uzaqqa sozylsa, munaı baǵasy 2008 jyly tirkelgen tarıhı maksımým — shamamen barreline 147 dollardan da asyp ketýi múmkin ekenin boljaǵan.