Starmer: Qytaı — Ulybrıtanııanyń ulttyq qaýipsizdigine qaýip tóndiretin el

ASTANA. KAZINFORM — Ulybrıtanııa premer-mınıstri Kır Starmer Qytaıdy Koroldiktiń ulttyq qaýipsizdigine naqty qaýip tóndiretin memleket dep atap, sonymen birge Pekınmen yntymaqtastyqty qoldaıtynyn da málimdedi. Bul týraly TASS jazdy.

«Iá, bul — Ulybrıtanııanyń ulttyq qaýipsizdigine shynaıy qaýip tóndiretin el», dedi brıtan úkimetiniń basshysy Londonda uıymdastyrylǵan dástúrli bankette.

Sonymen qatar Starmer London men Pekın arasyndaǵy berik qatynastardyń bolmaýyn synǵa aldy.

«Ýaqyty keldi: bizge baıypty kózqaras qajet. „Altyn dáýir“ nemese „Muz dáýiri“ sııaqty jeńildetilgen ekiudaı ustanymnan bas tartý kerek. El ózin qorǵaı otyryp, basqa memleketpen jumys istep, saýda júrgize alatyny — aıqyn fakt», dedi premer-mınıstr.

«Bizdiń jaýabymyz qorqynyshpen aıqyndalmaıdy jáne ıllıýzııalarmen jumsarmaıdy. Ol kúshke, aıqyndyqqa jáne baıypty realızmge negizdeledi», dep ýáde berdi Starmer. 

Onyń aıtýynsha, Pekınmen yntymaqtastyqqa qaramastan, Ulybrıtanııa Qytaı tarapynan jasalýy múmkin tyńshylyq áreketterin jáne zańsyz kıberqyzmetti toqtatady, Reseımen jumys isteıtin qytaılyq munaı-gaz kompanııalaryna sanktsııalar engizedi jáne adam quqyqtarynyń buzylýyn áshkereleıdi.

Buǵan deıin Ulybrıtanııanyń MI-5 qarsy barlaý qyzmeti Qaýymdar palatasy men Lordtar palatasynyń qyzmetkerlerine eskertý joldaǵan. Onda Qytaıdyń memlekettik qaýipsizdik mınıstrligi brıtan parlamenttik qaýymdastyǵyndaǵy jekelegen tulǵalarmen belsendi jumys isteıtini aıtylǵan. Maqsat — aqparat jınaý jáne «kásibı áleýmettik jelilerdi, rekrýterlik agenttikterdi jáne óz atynan áreket etetin konsýltanttardy paıdalaný arqyly» uzaq merzimdi baılanystardyń negizin qalyptastyrý.

Pekın bul aıyptaýlardy «taza oıdan shyǵarylǵan jáne aram nıetti jala» dep atady.

Eske sala keteıik, buǵan deıin Ulybrıtanııa Qytaımen qarym-qatynasty jańa deńgeıge shyǵarýdyń jolyn izdep otyrǵanyn jazdyq.