Starlink tarıfi belgili boldy
ASTANA.KAZINFORM — Qazaqstanda Starlink spýtnıktik ınterneti resmı túrde iske qosyldy. Qyzmettiń aılyq tarıfi 23 myń teńgeden bastalsa, termınal baǵasy shamamen 104 myń teńge. Bul týraly Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Dosjan Musalıev Jibek Joly telearnasynyń «Búgin LIVE» baǵdarlamasynda málimdedi.
— Tarıfter men qurylǵy baǵasy qoldaný túrine baılanysty ózgeredi. Starlink qyzmeti jeke tulǵalarmen qatar bıznes úshin de qoljetimdi, — dedi ol.
Sondaı-aq vıtse-mınıstr el aýmaǵynyń úlken bolýyna baılanysty barlyq óńirdi kabeldik ınternetpen qamtý qıyn ekenin, sondyqtan spýtnıktik sheshim qajet ekenin aıtty. Qazirgi tańda búkil Qazaqstan Starlink jelisimen qamtylǵanymen, shekara mańyndaǵy keı jerlerde sıgnal álsiz bolýy múmkin.
Buǵan deıin zańsyz ákelingen qurylǵylar da tirkeýdi talap etedi.
— Ielerine qurylǵyny zańdastyrý úshin 60 kún ýaqyt beriledi. Áıtpese, ol qurylǵylar buǵattalady, — dedi Musalıev.
Buǵan deıin, Starlink Qazaqstanda resmı túrde iske qosylǵanyn jazǵanbyz.