Starlink pen OneWeb-ke basymdyq berý egemendikke tikeleı qater tóndiredi — depsaýal
ASTANA. KAZINFORM — Májilis depýtaty Tilektes Adambekov Premer-mınıstrdiń orynbasary — Jasandy ıntellekt jáne tsıfrlandyrý mınıstri Jaslan Mádıevke«KazSat-3» spýtnıginiń taǵdyry týraly qaıta saýal joldap, 153 mlrd teńgeni únemdeý úshin avtonomdy baılanys arnasynan bas tartpaýdy surady.
— 2029 jyly «KazSat-3» spýtnıginiń paıdalaný merzimi aıaqtalady. Starlink jáne OneWeb júıelerin otandyq spýtnıkterge balama retinde paıdalanýǵa basymdyq berý egemendikke tikeleı qater tóndiredi. Qazaqstannyń ıýrısdıktsııasynan tysqary ornalasqan sheteldik provaıderlerge baılanys salasyndaǵy asa mańyzdy ınfraqurylymdy táýeldi etý qazirgi geosaıası jaǵdaıda óte qaýipti.
Otandyq jańa spýtnık jobasyna spýtnık ınternet engizýden bas tartý tek 153 mlrd teńgeni únemdeýmen ǵana negizdelgen, — dedi depýtat.
Sondaı-aq, ol «KazSat-3-R» spýtnıgin qurý konkýrsynda baǵasy qoldan qymbattatylǵan jabdyqtar alynýy múmkin degen kúdik aıtty.
— Byltyr jeltoqsanda jarııalanǵan «KazSat-3-R» spýtnıgin qurý týraly konkýrs standarttary memlekettik satyp alý qaǵıdalary boıynsha júrgizildi. Biraq bul formatta sheteldik sheteldik kompanııalar tenderge qatysa almaıdy. Bul tehnologııalyq turǵydan eskirgen, baǵasy negizsiz kóterilgen ónimdi alý qaýpin týdyrady. Osyǵan baılanysty qoldanystaǵy zańnama sheńberinde «KazSat-3-R» konkýrsyn ǵarysh salasyndaǵy álemdik kóshbasshylardy tartý tetikterin qarastyrýdy usynamyz.
«KazSat-3-R» spýtnık jobasyn spýtnık ınternetpen jabdyqtaýdy usynamyn, — dedi depýtat.
Aıta keteıik, Qazaqstan 2029 jyly «KazSat-3» spýtnıginiń ornyna jańa jerserik ushyrý josparlap otyr.
