Starlink Ózbekstanda 2026 jyly iske qosylýy múmkin

ASTANA. KAZINFORM — Starlink spýtnıktik ınterneti Ózbekstanda 2026 jyly iske qosylýy múmkin. Bul aqparat Starlink saıtynda jarııalandy. 

Amerıkalyq mıllıarder Ilon Maskqa tıesili SpaceX kompanııasynyń Starlink spýtnıktik ınternet-servısiniń jol kartasynda Ózbekstanda iske qosý ýaqyty 2026 jyl dep kórsetilgen.

Buǵan deıin Starlink Ózbekstan naryǵyna 2023 jyly shyǵady dep josparlanǵan. Keıinirek 2025 jyl kórsetildi, endi bul merzim taǵy bir jylǵa uzartyldy.

SpaceX 2022 jyly Ózbekstanda iri jobalardy júzege asyrýǵa daıyn ekenin málimdegen bolatyn.

Starlink Qazaqstanda resmı túrde 2025 jyly 13 tamyzda iske qosyldy. Osy ýaqytqa deıin ol tek qana pılottyq rejımde boldy, al joǵary jyldamdyqty ınternetti negizinen aýyl mektepteri paıdalandy. Endi qyzmet barlyq paıdalanýshylar úshin ashyq.

Starlink – 2015 jyly AQSh-tyń SpaceX kompanııasy (Ilon Mask negizin qalaǵan) ázirlegen jáne basqaratyn spýtnıktik ınternet júıesi. Onyń maqsaty – álemniń kez kelgen jerinde, tipti eń shalǵaı jáne damymaǵan aýdandarda da joǵary jyldamdyqty ınternetpen qamtamasyz etý.

Internet jyldamdyǵy ádette 50-250 Mbıt/s dıapazonynda bolady.

Eske sala keteıik, Qazaqstanda Starlink tarıfi belgili boldy.