Starlink Qazaqstanǵa resmı túrde keledi: kelisimge qol qoıyldy
ASTANA. KAZINFORM – Qazaqstan Tsıfrlyq damý, ınnovatsııalar jáne aeroǵarysh ónerkásibi mınıstrligi men Starlink kompanııasy (SpaceX-tiń enshiles qurylymy) spýtnıktik ınternet qyzmetin Qazaqstan aýmaǵynda resmı iske qosý týraly kelisimge qol qoıdy.
Qujat kompanııanyń elimizdiń aqparattyq qaýipsizdik jáne baılanys salasyndaǵy zańnamasyn tolyq saqtaı otyryp jumys isteýin kózdeıdi. Qujat Qazaqstan halqy úshin Starlink spýtnıktik termınaldaryn resmı túrde satýdy iske qosýdy kózdeıdi – satylymdar 2025 jyldyń úshinshi toqsanynda bastalady dep josparlanyp otyr.
Tsıfrlyq damý, ınnovatsııalar jáne aeroǵarysh ónerkásibi mınıstrligi málimetinshe, jobany iske asyrý eldiń shalǵaı óńirlerin joǵary jyldamdyqtaǵy spýtnıktik ınternetpen qamtamasyz etýde mańyzdy qadam bolmaq. Bul tsıfrlyq baılanys múmkindikterin keńeıtip, telekommýnıkatsııalyq ınfraqurylymdy damytýǵa tyń serpin beredi.
Joǵary jyldamdyqty ınternetke Starlink arqyly qosylý aýyldyq mektepter, medıtsınalyq mekemeler, mobıldi toptar men ınfraqurylym nysandaryna sapaly baılanysqa qol jetkizýge múmkindik beredi. Bul ásirese talshyqty-optıkalyq jelilerdi ekonomıkalyq nemese tehnıkalyq turǵydan tartýǵa qıyndyq týdyratyn óńirlerde ózekti bolyp otyr.
– Qazaqstan – aýmaǵy keń, halqy ár óńirge shashyrańqy ornalasqan el. Barlyq turǵyndy sapaly ınternetpen qamtý úshin biz talshyqty-optıkalyq baılanys jelilerinen uıaly baılanys munaralaryna deıingi túrli tásilderdi qoldanamyz. Alaıda jaıylymdar, taýly aýyldar men shalǵaıdaǵy kásiporyndar sııaqty qoljetimdiligi kúrdeli aımaqtar da bar. Ondaǵy turǵyndar da sapaly ınternetke qol jetkizýi tıis. Qazir álemde buǵan múmkindik beretin tehnologııalar bar. Búginge deıin Starlink elimizde tek mektepterge ınternet usynyp, pılottyq rejımde jumys istep keldi. Al halyq úshin ol resmı túrde qoljetimsiz edi. Endi biz kelisimge keldik, kompanııa aqparattyq qaýipsizdik pen baılanys salasyndaǵy ulttyq zańnama talaptaryna saı jumys isteıtin bolady. Bıyl qajetti jumystar júrgizilip, turǵyndar resmı ári zańdy túrde spýtnıktik ınternetke qosyla alady, - dedi mınıstr Jaslan Madıev.
Starlink jabdyqtaryn zańdastyrý men resmı qoldaný mártebesiniń erekshe mańyzy bar: endi azamattar termınaldardy zańdy túrde satyp alyp, paıdalanyp, Qazaqstan Respýblıkasynyń zańnamasyna sáıkes tirkeı alady.
Starlink spýtnıktik ınternetine qosylý arnaıy paıdalanýshy qurylǵylary arqyly iske asady. Qazirgi ýaqytta jeke paıdalanýshylarǵa qyzmet kórsetý tártibin qosa alǵanda, tehnıkalyq jáne uıymdastyrýshylyq máselelerdi kelisý jumystary júrgizilip jatyr.
Jobany iske asyrýdyń barlyq kezeńi ulttyq zańnama talaptaryn, sonyń ishinde qaýipsizdik talaptaryn saqtaı otyryp júrgiziledi.
Bul bastama Prezıdent Qasym-Jomart Toqaevtyń qala men aýyl arasyndaǵy tsıfrlyq teńsizdikti azaıtý jónindegi tapsyrmasyn oryndaý aıasynda júzege asyrylyp jatyr jáne «Qoljetimdi ınternet» ulttyq jobasynyń maqsattaryna sáıkes qolǵa alyndy.
Bıyl elimizde Starlink júıesin ornatý jalǵasatynyn jazǵan bolatynbyz.