Starbucks 400-ge jýyq kofehanasyn jaýyp jatyr

ASTANA. KAZINFORM — Starbucks AQSh-taǵy 900 qyzmetkerin jumystan bosatatynyn jáne aıdyń sońyna deıin Soltústik Amerıkadaǵy 400-ge jýyq saýda núktesin jabatynyn málimdedi, dep habarlady VVS. 

Sondaı-aq kompanııa Eýropadaǵy keıbir kofehanalaryn jabýdy josparlap otyr.

Qysqartýlardyń maqsaty — shyǵyndardy azaıtý.

Buǵan qosa, basshylyq bul ózgerister tutynýshylardyń saýda núktelerinde kútý ýaqytyn qysqartyp, tabysty oryndarda satýdy kóbeıtetinin aıtady.

Starbucks osy jyldyń aqpan aıynda AQSh-taǵy 1 100 jumys ornyn qysqartatynyn jáne satylymnyń tómendeýine baılanysty mázirin retke keltiretinin habarlady. Osylaısha kompanııa bir jyl ishinde óz elindegi 2 000 jumys ornyn qysqartýǵa májbúr boldy.

Kompanııanyń bas dırektory Braıan Nıkkoldyń aıtýynsha, kelesi qysqartý aıasynda Ulybrıtanııa, Shveıtsarııa jáne Aýstrııadaǵy keıbir kofehanalar da jabylady. Sonymen qatar kompanııa osy qarjy jylynda Ulybrıtanııada 80 jáne Eýropa, Taıaý Shyǵys jáne Afrıkada barlyǵy 150 jańa saýda núktesin ashý josparynan bas tartqan joq.

Shilde aıynda Starbucks jarııalaǵan toqsandyq esep boıynsha, brendtiń AQSh-ta ashylǵanyna bir jyldan kóp bolmaǵan kofehanalaryndaǵy satylym altynshy toqsan qatarynan tómendedi. Іshki naryq, Amerıka Qurama Shtattary, eń tanymal kofehanalar jelisi úshin eń mańyzdy naryq sanalady.

Starbucks aktsııalary teris qarjylyq nátıjeler aıasynda jyl basynan beri 8%-ǵa quldyrady.

TD Cowen sarapshylary AQSh-taǵy barǵan saıyn tanymal format — kólikten shyqpaı-aq kofe satyp alýǵa múmkindik beretin kofehanalar Starbucks-tyń eleýli básekelesine aınalǵanyn atap ótti.

— Starbucks kofehanalarynyń tutynýshylar aldyndaǵy ımıdji básekelesterdiń ımıdjimen salystyrǵanda nasharlap barady, - deıdi sarapshylar.

Saýalnamalarda tutynýshylardyń 70 paıyzdan astamy baǵanyń joǵary bolýyna baılanysty Starbucks-qa barýdy azaıtatynyn aıtty. 

Eske sala keteıik, Starbucks 1 100 qyzmetkerin qysqartpaq.