«Star of Asia» festıvaliniń alǵashqy kúni qazaqstandyq ánshiler óner kórsetti

Aıta keteıik, Almatyda 19 - 20 tamyz aralyǵynda erekshe formattaǵy «Star of Asia» halyqaralyq mýzyka festıvali ótedi. Búgin atalǵan festıvaldiń alǵashqy kúni qazaqstandyq estrada juldyzdary án shyrqady. Festıvaldiń ashylý saltanatynda aýqymdy «INTRO Star of Asia Almaty» qoıylymy qoıyldy. Onda artıster mýzykalyq sherýmen júrip ótip, árqaısysy óz janry men mýzykalyq baǵytyn tanystyrdy.

Ár juldyzdy kerýen iri megapolıstiń túrli salalaryn sıpattaı túsedi. Atap aıtqanda densaýlyq, kásipkerlik, áleýmettik sala t.b. Festıvaldiń ashylý saltanatynda oryndalǵan ánderdiń derlik barlyǵy arý qala Almatyǵa arnaldy. Olar, «Dos Muqasan» - «Almaty túni», Álı Oqapov - «Almaty - lıýbımyı gorod», Erbolat Qudaıbergen - «Almatınskoe leto», Zarına Altynbaeva men Tólegen Rahymbaev - «Gúl Almaty», Ardaq Balajanova men Dastan Orazbekov - «Almaty ólke», Qaırat Nurtas -«Almatynyń túnderi-aı» jáne t.b.

Kontserttik baǵdarlamada pırotehnıkalyq jáne lazerlik qondyrǵylar, jaryqdıodty qurylymdar men ekrandar, qara kóleńkeli LED-alaýlar men qozǵalmaly sahna bolady. Sahnaǵa kóterilgen ártisterge jaryqdıodty kostıýmder kıgen veloshabandozdar ere shyqty. Sahnada retromobılder, sporttyq mototsıklder, avtomobılder, áýe gımnasttary men kaskaderler, tsırk ártisteri, cherlıderler, skeıtbordshylar men breık-bıshileri, balet artısteri men sımfonııalyq orkestr de boldy.

Júrgizýshiler mýzykalyq shoý 118 elde tikeleı efır arqyly translıatsııalanǵanyn jetkizdi. Baıqaýdyń jalǵasy erteń bolmaq. Onda sheteldiń tanymal óner juldyzdary án salady.