Stanıslavskıı atyndaǵy Qaraǵandy teatry mereıtoılyq maýsymyn ashady
QARAǴANDY. QazAqparat - 11 qyrkúıekte saǵat 18.30-da K. S. Stanıslavskıı atyndaǵy Qaraǵandy orys drama teatry óziniń mereıtoılyq 90-shy maýsymyn onlaın formatta bastaıdy, dep habarlaıdy QazAqparat tilshisi.
Teatr 90 jyldyqty mereıtoı keshimen atap ótýdi josparlaýda. Ashylý saltanaty teatr foıesinde akterlerdiń qyzyl kilemmen ótý sharasymen bastalady. Keıin Dýnaı Espaevtyń qoıylymyndaǵy Devıd Krıstnerdiń «Gorıachıe mamochkı» komedııasynyń onlaın-translıatsııasy júrgiziledi.
Saltanatty sharany stanislavsky.kz saıtynan kórýge bolady.
Jańa teatr maýsymynda kórermenderdi ótken jyldardaǵy spektaklderden basqa, jańa premeralar kútedi. Teatr jetekshisi Dýnaı Espaev Muhtar Áýezovtiń «Abaı joly» romanynyń jelisi boıynsha jazǵan Keńes Jumabekovtyń «Znaı, potomok, dorogý ıa dlıa tebıa stlal!» dramasyn sahnalamaq. Ekinshi dúnıejúzilik soǵystaǵy Jeńistiń mereıtoıyna oraı kórermender nazaryna Belgorod rejısseri Vladımır Borodınniń qoıylymyndaǵy Grıgorıı Gorınniń «Qosh bol, konferanse!» spektakl-kontserti usynylady. Sodan keıin máskeýlik Konstantın Mıshınniń qoıylymyndaǵy Ýılıam Shekspırdiń «Makbet» tragedııasynyń premerasy josparlanǵan.
Balalar úshin teatr akteri Konstantın Snegırev Oksana Rozýmnyń «Sıqyrly shartyldaq» jańa jyldyq ertegisin qoıady. Taǵy bir premera - Galına Týrchınanyń qoıylymyndaǵy Lora Kannıngemniń «Devıchnık» lırıkalyq komedııasy. Teatr ujymy osy bep premerany kórermenderge 2020 jyldyń sońyna deıin kórsetýge úmittenip otyr.
2021 jyly Molerdiń «Jorj Danden» komedııasyn qoıý úshin Grýzııadan rejısser Týrgaı Velızadeni shaqyrý josparda bar, al Peterbýrgtik Arshad Alekperov Ivan Vyrypaevtyń «Valentın kúnin», Chývashııadan kelgen qoıýshy rejısser Stanıslav Vasılev - Ivan Sergeevıch Týrgenevtiń «Mesıats v derevne» nemese «Ottsy ı detı» fılmin kórsetýdi josparlap otyr. Pesany tańdaý qazir talqylaný barysynda.
