Stanıslav Cherchesov aıyppul tóleıtin boldy

ASTANA. KAZINFORM - Fýtboldan Qazaqstan ulttyq quramasynyń bas bapkeri Stanıslav Cherchesov baspasóz máslıhaty kezindegi áreketi úshin jaza arqalady.

Aıta ketsek, el quramasynyń Ulttar lıgasy aıasynda óz alańymyzda ótken Slovenııamen kezdesýinen keıin oǵan PSJ jeıdesin kıgen jýrnalıst qazaq tilinde saýal qoıǵan edi. Bas bapker suraq qoıǵan jýrnalıstke «Frantsýz tilinde suraq qoıyp tursyń ba?» dep aıtqan bolatyn.

Bul jaǵdaı áleýmettik jelide kópshilik arasynda talqylandy. Bas bapkerdiń bul óreskel áreketi úshin Qazaqstan fýtbol federatsııasy tarapynan aıyppul salyndy. Aıyppul kólemi – 200 aılyq eseptik kórsetkish (738 400 teńge).

Eske salsaq, atalǵan jaǵdaıǵa baılanysty QR Týrızm jáne sport mınıstrligi bul jaǵdaıǵa beıjaı qaramaı, Qazaqstan fýtbol federatsııasyna resmı hat joldap, bas bapkerdiń áreketine qatysty Fýtbol federatsııasynan túsinikteme berýdi talap etken bolatyn.

«Áleýmettik jelilerde jarııalanǵan fýtboldan Qazaqstan ulttyq quramasynyń bas bapkeri Stanıslav Cherchesovtiń qazaq tiline qurmet kórsetpeýine qatysty vıdeoǵa baılanysty Qazaqstan fýtbol federatsııasy jaǵdaıdy túsindiri ótý qajet dep sanaıdy. Jazbada vıdeonyń úzindisi kórsetilgen. Negizi bul suraqty Frantsııanyń PSJ klýbynyń formasyn kıip júrgen qazaqstandyq jýrnalıst Begasyl Seıitqanov baspasóz máslıhatynda qoıǵannan keıin bas bapker ázildep jaýap qaıtarǵan bolatyn. Stanıslav Cherchesov qazaq tili men elimizdiń mádenıetine úlken qurmetpen qaraıdy, sonymen qatar qazaq tilin belsendi túrde oqyp jatqanyn málimdeımiz», - dep túsinikteme berdi Fýtbol federatsııasynyń baspasóz qyzmeti.