Stanımır Stoılov: Óz alańymyzda kez kelgen eýropalyq komandany utýǵa tyrysýymyz kerek
ASTANA. QazAqparat - Búgin elordaǵa ushyp kelgen portýgalııalyq «Benfıka» komandasy «Astana Arena» stadıonynda oıyn aldyndaǵy jattyǵýyn ótkizdi. ÝEFA Chempıondar lıgasynyń toptyq kezeńindegi portýgalııalyq jáne elordalyq «Astana» komandasynyń arasyndaǵy oıyn erteń jergilikti ýaqyt boıynsha saǵat 21:00 bastalady, dep habarlady qalalyq ákimdiktiń baspasóz qyzmetinen.
Búgin baspasóz maslıhaty barysynda elordalyq fýtbol klýbynyń jattyqtyrýshysy Stanımır Stoılov komandanyń óz alańynda ótetin oıynda jeńiske ǵana umtylatynyn málim etti. - «Benfıka» - óte kúshti, asa salmaqty komanda. Árıne, alań ıeleri kúresýge, jeńiske qol jetkizýge tyrysady. Eger barlyq múmkindikti durys paıdalana alsaq, upaı alýǵa múmkindigimiz bar. Qoldan kelgenniń barlyǵyn jasaımyz, aıanyp qalmaımyz. Menińshe, fýtbolshylar ózderine qandaı jaýapkershilik júktelgenin biledi, - dedi Astana klýbynyń jattyqtyrýshysy. Onyń aıtýynsha, «Qaırat» komandasynyń jeńisi oıynshylardyń kóńil-kúıine áser etken joq. 10 kúnniń ishinde fýtbolshylar biraz demaldy, al «Qaıratpen» ótken kezdesý oıyn barysyna ilesý úshin keremet múmkindik boldy. Aıta keteıik, Chempıondar lıgasy oıyndary aıasynda «Astana» komandasy óz alańyndaǵy kezdesýlerde jeńilgen emes. - Bizdiń alań - bizdiń qorǵan dep udaıy aıtamyn. Bar kúshimizdi salyp, óz alańymyzda kez kelgen eýropalyq komandany utýǵa tyrysýymyz kerek, - deıdi ol. - Óz alańymyzda jeńilmeı kele jatqanymyzǵa belgili bir deńgeıde jasandy alań da septigin tıgizdi, bul bizge biraz basymdyq beredi, alaıda kásipqoı fýtbolshy úshin bul qıyndyq týdyrmaýǵa tıis. Sonymen qatar, «Astana» klýbynyń jattyqtyrýshysy komandanyń jeńiske jetýinde jankúıerlerdiń qoldaýy da úlken ról atqaratynyn aıtty. Fýtbolshylar erteń de «on ekinshi oıynshynyń» qoldaýyn sezinetinderine úmitti. Eske salaıyq, 25 qarashada saǵat 19:00 bastap, Qabanbaı batyr jáne Turan dańǵyldarynyń boıynda Kereı men Jánibek handar kóshesinen Hýseın Ben Talal kóshesine deıingi jol ýchaskesi qoǵamdyq kólikter men taksıden basqa kólik quraldary úshin oıyn aıaqtalǵansha jabyq bolady. Júrgizýshilerge Orynbor kóshesiniń boıymen júrý usynylady. Fýtbol jankúıerleri «Astana Arena» stadıonyna №№10, 12, 27, 40, 43, 51 avtobýstarmen jete alady. Sondaı-aq, jankúıerlerge qolaıly bolýy úshin saǵat 19:00 alty jerden arnaıy reıster (shattldar) attanatyn bolady: - «Qazaqstan» SK (Qajymuqan kóshesi); - «Haziret Sultan» meshiti (Qoshqarbaev dańǵ.); - Muńaıtpasov atyndaǵy stadıon (Kenesary kóshesi); - «Jastar» teatry (burynǵy Opera jáne balet teatry, Zataevıch kóshesi); - «Nur Astana» meshiti (turaqtyń shyǵys jaǵy); - Tsırk (turaq, Qorǵaljyn tas jolynyń boıynda). Arnaıy reıstik avtobýstarmen jol júrý quny: eresekter úshin - 90 teńge, 15 jasqa deıingi balalar úshin - 40 teńge, jol júrý bıletteri jaramsyz. Keri qaıtý úshin stadıonnyń turaqtarynda jáne Qabanbaı batyr dańǵylynyń boıynda «Astana Arena» stadıonynyń aıaldamasynda joǵaryda kórsetilgen 6 jerge arnaıy reıstik avtobýstar, sondaı-aq, №10, 12, 27, 28, 30, 40, 43, 51, 61 baǵyttar boıynsha avtobýstar turady. Astana halyqaralyq áýejaıy aımaqtaryna jáne jaqyn mańdardaǵy kentterge baratyn azamattar aınalma baǵyttardy aldyn ala josparlaýy qajet. Astana qalasynyń ІІD Ákimshilik polıtsııa basqarmasy fýtbol oıynyna kelgisi keletin avtokólik ıelerine qoǵamdyq kóliktermen kelýdi usynady. Budan bólek, is-shara ótetin aımaqta Ákimshilik polıtsııa basqarmasynyń evakýatorlary jumys isteıtin bolady. Kólik quraldaryn toqtatý jáne qoıý erejelerin buzǵany úshin avtokólikterdi aıyp turaǵyna jetkizý sııaqty ákimshilik yqpal etý sharalary qoldanylmaq.
