Standard&Poor's Qazaqstannyń táýelsiz kredıttik reıtıngin «BBB-/A-3» deńgeıinde rastady

ASTANA. KAZINFORM - Standard&Poor's halyqaralyq reıtıng agenttigi Qazaqstannyń táýelsiz kredıttik reıtıngin «BBB-/A-3» deńgeıinde rastady, boljam – «Turaqty», dep habarlaıdy QR Ulttyq ekonomıka mınıstrliginiń baspasóz qyzmeti.

Eldiń reıtıngin qoldaıtyn negizgi faktorlar yqtımal syrtqy táýekelder úshin jetkilikti rezervterdi qamtamasyz etetin qýatty fıskaldyq jáne syrtqy balanstar bolyp qala beredi.

Agenttik sarapshylary eldiń ótimdi syrtqy aktıvteri syrtqy boryshtan edáýir asyp túsedi dep boljap otyr.

S&P munaı óndirýdiń josparlanǵan ósýi jáne Teńiz munaı ken ornyndaǵy qýattylyqtardyń keńeıýi ekonomıkalyq ósimge oń áser etetinin atap ótti.

Basylymda Qazaqstannyń orta merzimdi fıskaldyq traektorııasy fıskaldyq erejelerdiń saqtalýyna baılanysty bolatyndyǵy atap ótildi. Salyq bazasyn keńeıtý jáne QR Ulttyq qorynan qosymsha transfertterdi shekteý bıýdjet tapshylyǵyn azaıtýǵa múmkindik beredi dep kútilýde.

Sondaı-aq S&P Qazaqstannyń bank sektoryn geosaıası jáne makroekonomıkalyq táýekelderge turaqtylyǵyn atap ótti. Sarapshylardyń pikirinshe, ekinshi deńgeıli bankterdiń kapıtal qory men turaqty ótimdiligi jetkilikti.

Osyǵan deıin Fitch uıymynyń Qazaqstannyń táýelsiz kredıttik reıtıngin rastaǵany týraly jazdyq.