Stantsııadaǵy seıften 1 mln teńgege jýyq qarajat urlaǵan adam ustaldy
NUR-SULTAN. QazAqparat – Kólik polıtseıleri «Jolaýshylar tasymaly» AQ fılıalynyń seıfinen 1 mln teńgege jýyq qarajat urlaǵan er adamdy ustady. Bul týraly QazAqparat Kóliktegi polıtsııa departamentiniń baspasóz qyzmetine silteme jasap habarlaıdy.
Almaty 1 stantsııasyndaǵy Jelilik polıtsııa basqarmasyna «Jolaýshylar tasymaly» AQ aımaqtyq fılıaldarynyń birine tıesili ınkassatorlyq kassa bólmesine belgisiz tulǵalardyń zańsyz kirip, seıf ishinen aqshalaı qarajat jymqyrǵany týraly habarlama kelip tústi.
Atalǵana fakt boıynsha QR QK-niń 188-baby 3-bóliginiń 3-tarmaǵymen, ıaǵnı, qyzmettik nemese óndiristik úı-jaıǵa zańsyz kirýmen jasalǵan urlyq faktisi boıynsha sotqa deıingi tergeý amaldary bastaldy.
Atalǵan qylmysty ashý maqsatynda kólik polıtsııasynyń tájirıbeli qyzmetkerlerinen jedel-tergeý toby quryldy.
Jedel-izdestirý sharalaryn júrgizý barysynda qylmys jasady degen kúdikpen Almaty oblysynyń 27 jastaǵy turǵyny anyqtalyp, ustaldy.
Tekserý barysynda qaskóıdiń túngi ýaqyt kezinde armatýramen tereze temirtoryn buzyp, bólme ishinde turǵan metell seıfti ashyp, onyń ishinen 1 mln teńgege jýyq aqsha urlaǵandyǵy anyqtaldy. Sondaı-aq, ol osy qylmysty jasaý maqsatynda joǵaryda atalǵan mekemeniń kassırimen aldyn ala josparly dostyq qarym-qatynas ornatyp, onyń jumys orny jaıynda tolyq málimetterdi bilip alǵandyǵy belgili boldy.
Almaty qalasy Jetisý aýdanynyń №2 sotynyń úkimimen er adam qylmystyq quqyq buzýshylyq jasaǵany úshin kináli dep tanylyp, oǵan 3 jyl 6 aı merzimge bas bostandyǵyn shekteý jazasy taǵaıyndaldy.
