Stantsııa qyzmetkerleri temir jol bólshekterin metall qabyldaý pýnktine ótkizip jibergen

ASTANA. QazAqparat - Jezqazǵan stantsııasyndaǵy jelilik polıtsııa bólimine jol bólimderiniń birindegi kezekshiden aryz kelip tústi. Onda 3 qazan kúni «Jeńis-Qyzyljar» ótkelinde belgisiz bireýlerdiń 117 dana joǵarǵy jol qurylym bólshekterin, onyń ishinde, 57-si tósem, 25-si baldaq jáne 35-si vagondardy urlap ketýge qarsy qurylǵylarynyń qoldy bolǵany aıtylǵan. Bul týraly Kóliktegi ІІD baspasóz qyzmeti habarlady.

Jedel-izdestirý sharasy barysynda, kólik polıtseıleri Jeńis stantsııasynda Qaraǵandy oblysynyń 5 turǵynyn ustady. Kúdiktiler aldyn ala kelisý arqyly joǵaryda atalǵan múlikterdi urlap, Jeńis aýylyndaǵy metall qabyldaý pýnktine ótkizgen.

Tekserý barysynda ustalǵandardyń barlyǵy Jeńis stantsııasyndaǵy jol bólimshesiniń qyzmetkerleri ekendigi anyqtaldy. Urlanǵan zattar tárkilenip, keltirilgen shyǵyn kólemi anyqtalyp jatyr.

Qazir osy faktige sáıkes, QR QK-niń 175-baby, ıaǵnı, urlyq boıynsha qylmystyq is qozǵaldy, delingen habarlamada.