Ystambulda metro qurylysy kezinde jer qabaty opyrylyp, 1 adam qaza tapty
ASTANA. KAZINFORM — Stambýldaǵy Beshıktash aýdanynda metro jelisin salý jumystary kezinde jer qabaty opyrylyp, 1 adam qaza taýyp, birneshe adam aýrýhanaǵa jetkizildi. Bul týraly TV 100 telearnasyna habarlady.
Beıoglý aýdanyndaǵy Medjlıs-ı Mebýsan kóshesindegi Kabatash pırsi janynda M7 metro jelisinde jumys júrgizý kezinde tómengi 6-qabat deńgeıinde jer qyrtysy opyrylǵan.
Jergilikti BAQ-tyń málimetinshe, apattan bes adam zardap shekken. Olardyń úsheýi ózderi shyǵyp úlgerse, al ekeýi qutqarý qyzmeti arqyly evakýatsııalandy.
Qurylys ornyndaǵy jer qabatynyń túsip ketý sebepteri áli belgisiz. Opyrylý jer asty platformalardyń birinde bolǵany habarlandy.
Stambýl gýbernatorynyń málimdeýinshe, opyrylýdan zardap shekken 5 jumysshynyń úsheýi aýrýhanaǵa jetkizilgen, olardyń bireýi kóz jumdy.
Stambýl provıntsııasynyń densaýlyq saqtaý basqarmasynyń basshysy Abdýlla Emre Gıýnerdiń aıtýynsha, aýrýhanaǵa túsken jumysshynyń barlyq qabyldanǵan sharalarǵa qaramastan janyn saqtap qalý múmkin bolmaǵan.
Eske sala keteıik, Italııa astanasy Rımde kóne munara qırap, úıindisiniń astynda jumysshy qalyp qoıǵanyn jazdyq. Jarty táýlikteı ýaqyt úıindiniń astynda jatyp qalǵan jumysshy qutqarýshylardyń kómegimen syrtqa shyǵarylǵanymen, kóp uzamaı aýrýhanada kóz jumdy.