Stambul konventsııasy tóńiregindegi daý Latvııany saıası daǵdarysqa ákelýi múmkin

ASTANA.KAZINFORM — 30 qazan kúni Latvııa Seımi qyzý pikirtalastardan keıin eldiń áıelderdi zorlyq-zombylyqtan qorǵaýǵa arnalǵan Stambul konventsııasynan shyǵýyn maquldady. Bul sheshimdi 56 depýtat qoldady — olardyń kópshiligi bılik koalıtsııasyna kiretin «Jasyldar men sharýalar odaǵy» partııasynyń músheleri, dep jazdy DW.

Partııa ókilderi konventsııa «dástúrli otbasylyq rólderdi buzady» dep sanaıdy. Daýys berýdiń aldynda Seım ǵımaratynyń aldynda sońǵy bir jyl ishindegi eldegi eń iri mıtıng ótti.

Sońǵy bes jylda Latvııada úkimet eki ret aýysty. Qazirgi premer-mınıstr Evıka Sılınıa bastaǵan «Jańa birlik» partııasy koalıtsııalyq seriktesterimen birge parlamentte kópshilik orynǵa ıe. Alaıda daýys berý kezinde «Jasyldar men sharýalar odaǵy» koalıtsııalyq kelisimdi buzdy, bul elde saıası daǵdarys qaýpin týdyryp otyr. Oppozıtsııalyq «Birikken tizim» partııasynyń depýtaty Andrıs Kýlbergs «úkimet is júzinde qulady» dep málimdep, premer-mınıstrdi koalıtsııada tártip ornatýǵa nemese otstavkaǵa ketýge shaqyrdy.

Eldiń konventsııadan shyǵý týraly zańy prezıdent Edgar Rınkevıchke joldandy. Prezıdent bul zańdy Seımge qaıta qaraýǵa bir ret qana qaıtara alady. Eger parlament ony qaıtadan maquldasa, memleket basshysy zańǵa qol qoıýǵa mindetti bolady.

Bıleýshi partııanyń depýtattary sonymen qatar búkilhalyqtyq referendým ótkizýdi usyndy — bul jaǵdaıda zańnyń kúshine enýi eki aıǵa toqtatylady.

Al Stambul konventsııasyn jaqtaýshylar Latvııanyń Konstıtýtsııalyq sotyna júginýi múmkin. Degenmen, eldiń Konstıtýtsııalyq soty buǵan deıin ratıfıkatsııalanǵan halyqaralyq kelisimnen bas tartý máselesin eshqashan qarastyrǵan emes.

Aıta keteıik, Lıtva, Latvııa men Estonııa jaıaý áskerge qarsy mınaǵa tyıym salý konventsııasynan shyqty.