Stalkıng úshin 50 táýlikke deıin qamaý jazasy engizildi

ASTANA. KAZINFORM — Qazaqstanda stalkıng alǵash ret qylmystyq quqyqbuzýshylyq retinde zańmen bekitildi. Endi júıeli túrde qýdalap, psıhologııalyq qysym kórsetkender qylmystyq jaýapkershilikke tartylady.

Astana qalasy Polıtsııa departamenti Qoǵamdyq qaýipsizdik basqarmasynyń basshysy Marat Ómirbaev málimdegendeı, 2025 jylǵy 16 shildede «Zań jáne tártip» tujyrymdamasyn iske asyrý aıasynda Qylmystyq kodekske 115-1-bap — «Stalkıng» engizildi. Osylaısha, ulttyq zańnamada jábirlenýshiniń erkindigine júıeli túrde qysym kórsetkender derbes qylmys retinde tanyldy.

— Bul norma azamattardyń quqyqtary men bostandyqtaryn qorǵaýǵa, quqyqbuzýshylyqtyń aldyn alýǵa jáne qoǵamda psıhologııalyq qysymǵa nóldik tózbeýshilik qaǵıdatyn qalyptastyrýǵa baǵyttalǵan, — dedi Marat Ómirbaev Astana qalasynyń kommýnıkatsııalar qyzmetinde ótken brıfıngte.

Jańa bapqa sáıkes, stalkıng jasaǵany úshin 200 aılyq eseptik kórsetkishke deıin aıyppul, 200 saǵatqa deıin qoǵamdyq jumystar nemese 50 táýlikke deıin qamaýǵa alý jazasy qarastyrylǵan.

Polıtsııa ókiliniń aıtýynsha, eger qýdalaý kúsh qoldanýmen, qorqytýmen nemese jeke ómirge qol suǵýmen qatar júrse, onda bul áreket Qylmystyq kodekstiń basqa baptary boıynsha da qaralady.

Eske salaıyq, jýyrda Almatyda azamattardy qasaqana qýdalaý men psıhologııalyq qysymnan qorǵaýǵa baǵyttalǵan Qylmystyq kodekstiń 115-1 baby boıynsha alǵashqy sot úkimderiniń biri shyqty.