Stalkıng boıynsha 2 qylmystyq is qozǵaldy — ІІM
ASTANA. KAZINFORM — Qylmystyq kodekske «Stalkıng» baby engizilgen sátten beri eki is qozǵaldy. Bul týraly Іshki ister mınıstri Erjan Sádenov aıtty.
— Qoldanysqa engizilgen sátten beri 2 qylmystyq is qozǵaldy — Atyraý jáne Pavlodar oblystarynda. Qazir tergeý júrip jatyr. Bul aryz boıynsha qozǵalǵan ister, — dedi Erjan Sádenov Іshki ister mınıstrliginde ótken Úkimet saǵatynan keıin BAQ ókilderiniń saýalyna oraı.
Aıta keteıik, Azamattardyń jeke bas bostandyǵyn qorǵaý jónindegi sharalardy kúsheıtý maqsatynda jáne «Zań men Tártip» tujyrymdamasyn iske asyrý aıasynda 2025 jylǵy 16 shildede Memleket basshysy Qylmystyq kodekske 115-1 — «Stalkıng» jańa baby engizilgen zańǵa qol qoıdy.
Stalkıng — bul adammen qarym-qatynas ornatýǵa jáne (nemese) onyń erkine qaıshy keletin, zorlyq-zombylyqpen ushtaspaǵan, eleýli zııan keltirgen áreketterdi bildiretin adamdy zańsyz qýdalaý. Otandyq zańnamada mundaı áreketter úshin 200 AEK-ke deıin aıyppul, 200 saǵatqa deıin qoǵamdyq jumystar nemese 50 táýlikke deıin qamaýǵa alý túrindegi qylmystyq jaýapkershilik alǵash ret kózdelgen.