Stalıngrad túbindegi shaıqasqa qatysýshy Imıat Súntaev: Jaraly bolsaq ta aıqasqa umtyldyq (FOTO)
Óziniń soǵys jyldary bastan keshkenderin QazAqparat tilshisine 91 jastaǵy maıdanger Imıat Súntaev aıtyp berdi.
«1922 jyldyń qazanynda Pavlodar oblysynyń Aqtoǵaı aýdany Qojamjar aýylynda dúnıege keldim. Segiz jasymda anamnan aıyryldym. 8 synypty bitirgennen keıin bastaýysh synyp muǵalimderin daıyndaıtyn Pavlodar ýchılışesine oqýǵa tústim. Keıin jergilikti mektepte muǵalim bolyp istedim. Sodan kóp uzamaı soǵys bastaldy. 1942 jyly áskerı ýchılışede alty aı kýrstan ótken soń men maıdanǵa tústim. Stalıngrad túbindegi urystarǵa qatystym. Ol shaıqastar soǵystyń sheshýshi sátteri bolatyn. Biz eshqashan ultqa bólingen joqpyz. Óte tatý bolatynbyz, bir-birimizge qolymyzdan kelgenshe qoldaý kórsetip otyrdyq. Meniń týǵan aýylymnan menimen birge Otan qorǵaýǵa eldegi barlyq derlik jas jigitter attandy. Ókinishke qaraı, olardyń kóbi soǵystan oralmady. Meniń ózim de jaýmen shaıqasqan urystardyń birinde aýyr jaralandym. Ol 1942 jyldyń sońy bolatyn. Gospıtalde em alyp shyqqannan keıin 3-shi Ýkraına frontyna 73-shi atqyshtar brıgadasynyń quramyna qosyldym. Meni motoatqyshtar batalonynyń avtomatshylar bóliminiń komandıri etip taǵaıyndady. 1943 jyldyń kúzinde Ýkraınanyń Nıkolaev qalasyn azat ettik. Sol jyldyń jeltoqsan aıynda aýyr jaralandym. Jarylǵan snarıadtyń birneshe bóligi deneme qadaldy, olardyń bireýi tamaǵyma tıdi, ekinshisi osy kúnge deıin júregimniń tusynda. Maǵan daladaǵy gospıtalde ota jasaldy, biraq keıin meni Astrahanǵa jiberdi, onda taǵy da pyshaqtyń astyna tústim. Daýysymdy joǵalttym, múlde sóıleı almadym. Osy aýyr jaraqattan keıin meni qansha baramyn dep talpynsam da maıdanǵa jibermedi. Sondaǵy oı bireý ǵana bolatyn - Otandy, halyqty qorǵaý», - deıdi Imıat ata.
Kúrdeli otadan keıin ol elge oralǵan jáne jańa ómir bastaǵan. Kelgen soń tamaǵyna taǵy bir ota jasaǵan. «Taǵdyrdyń osyndaı kedergilerine qaramastan, men aldyma maqsat qoıdym - ol qoǵam men elime paıdamdy tıgizý. Muǵalim boldym, kásiporynda istedim, biraq ýaqytym men kúshimniń kóbin jol qyzmetine jumsadym. Bul salada kóptegen jetistikterge qol jetkizdim, jetekshige deıin kóterildim. Ómirlik serigim Qumsendi kezdestirgesin jumysym jeńildedi. Ekeýimiz mine 70 jyldan beri birgemiz. Ol árqashan meniń súıenishim, ári keńesshim. Ekeýimiz birge 8 balany tárbıelep, ósirdik», - dep atap ótti úlken shańyraqtyń ıesi.
Imıat atanyń aıtýynsha, balalardyń bári Uly Otan soǵysy jaıly, bizdiń batyrlarymyzdyń erlikteri jaıly jaqsy biledi jáne Jeńis kúni bul úıde eń basty otbasylyq merekege aınalǵan.
"Soǵys týraly kóp aıtýǵa bolady. Ol bir óte qıyn kezder edi. Biz sońǵy qalǵan nandy bólip jedik, ólimge týra qarap, tek Jeńiske umtyldyq.
Osyndaı aıtýly kúni beıbitshilikte ómir súreıik, balalarymyz ben nemerelerimiz mundaıdy bastan ótkermesin dep tileımin. Eńbektenińder, aldaryńa qoıǵan maqsattaryńa qol jetkizińder jáne baqytty bolyńdar, densaýlyqtaryń myqty bolsyn", - dep aıaqtady áńimesin aqsaqal.
