Stalındik repressııa qurbany bolǵan 92 jastaǵy qarııanyń bar armany - aqtalý
ASTANA. 30 mamyr. QazAqparat - Talaıdy sarsańǵa salǵan saıası qýǵyn-súrgin, stalındik repressııa búginde 92-niń seńgirine shyqqan Ahmetbek Nurmanov aqsaqaldyń balalyq shaǵyn jalmasa, al fashızmmen soǵys jastyq dáýrenin qurdymǵa ketirdi. Bul týraly QazAqparat Alash aınasy gazetine silteme jasap habarlaıdy.
Iá, dál qazirgi ýaqytta qarııanyń sanasynan sonaý qıyn-qystaý kezeńdegi, naqty aıtqanda nemis lageri men ıtjekkenniń azaby umytyla bastaǵany da ras. Degenmen, onyń janyna batyp, kóńiline qaıaý túsirip otyrǵany táýelsiz el bolyp, etek-jeńin qymtaǵan egemen Qazaqstanda «Otanyn satqan» degen saıası jaladan aryla almaýy.
Aqtóbe oblysy Oıyl aýdanynyń turǵyny Ahmetbek aqsaqaldyń aıtýynsha, fashıstik basqynshylar 1941 jyly Keńes Odaǵynyń shekarasyna tutqıyldan basyp kirgen mezette 20-shy armııaǵa qarasty 1856-artıllerııalyq bólimniń 42 áskeri tutqynǵa túsipti. Mine, osy tutqyndar arasynda 20 jastaǵy Ahmetbek qarııa da boldy. Azııalyq tutqyndardan Túrkistan legıonyn qurýdy kózdegen nemister ony Polshadan Italııaǵa jer aýdarady.
«Italııada aýyr jumysqa jegilgen kezim. Men Túrkistan ıdeıasy týraly eshteńe bilgen de, estigen de joqpyn. Eshkim eshteńe aıtyp túsindirmedi. Keıin estidim, bul legıon Orta Azııa elderin biriktirýdi kózdeıdi eken. Meniń oılaǵanym tek elge qaıtý boldy. Ideıany ne qylaıyn?! «Shań basqan Oıylym qymbat» dep eseptedim. Biz reti kelse, keńes áskerlerine qosylýdy oıladyq, batys maıdanynda amerıkalyq áskerler fashısterge shabýyl jasaǵan kezde sonyń sáti tústi. Azııalyq násildi biraz adam amerıkalyqtardyń arqasynda keńes áskerine qosyldyq. Bizdi «Rodına jdet, Rodına prostıt» degen plakattary bar kememen Toronto qalasynan Mysyrdyń Saıd beketi, Irak, Iran arqyly Ázerbaıjanǵa ákeldi. Sol kezde Keńes Odaǵy ústimizden «Otanyn satý» baby boıynsha qylmystyq is qozǵady», - deıdi A.Nurmanov.
Bastapqyda Kýzbass kenishindegi aýyr jumysqa jegilgen aqsaqal keıin Kolymaǵa 30 jylǵa jer aýdarylady. Aıaz ben ashtyqty, aıyptaý men azaptaýdy kórgen A.Nurmanov aqsaqal Stalın ólgennen keıin ǵana túrmeden merziminen buryn bosatylyp, elge oralady. Degenmen, arada 58 jyl ótse de, Ahmetbek aqsaqal saıası jaladan áli kúnge deıin aryla almaı otyr.
«QR Bas prokýratýrasyna, Ulttyq qaýipsizdik komıtetine, «Nur Otan» halyqtyq-demokratııalyq partııasyna, mınıstrlikterge, taǵy basqa organdarǵa hat jazdym. Jaýap joq. Nege memlekettik organdar adam taǵdyryna sonsha jaýapsyz qaraıdy?! Qazir Keńes Odaǵynyń zańdary kelmeske ketti emes pe?! Onyń ústine, men jazamdy ótedim. Endi meniń ómirimniń kóbi ketip, azy qaldy. Úkimetimiz burynǵy áskerı tutqyndardy aqtap, keshirim jasasa eken deımin», - deıdi aqsaqal.
