Stalındik qýǵyn-súrgin týraly shyndyqtyń kóbi muraǵattarda jatyr-Mámbet Qoıgeldi
ALMATY. Aqpannyń 24-i. QazAqparat /Erbol Azanbek/ - Stalındik qýǵyn-súrgin týraly shyndyqtyń kóbi muraǵattarda jatyr.
Búgin Almatyda ótken «Stalınızm: repressııalanǵan Qazaqstan» aty halyqaralyq konferentsııa barysynda tarıh ǵylymynyń doktory, professor Mámbet Qoıgeldi osyndaı pikir bildirdi, dep habarlaıdy QazAqparat.
Belgili tarıhshynyń aıtýynsha, qazir Reseıde Stalın týraly qyzý talqylaý júrip jatyr. Ol týraly kitaptar jazylyp, fılmder túsirilýde. Al qazaq qoǵamy Stalınge sol reseılik kózqaraspen qarap otyr. «Biz Stalın zobalańyn kóp kórdik. Ashtyq pen repressııada myńdaǵan adamdarmen qatar, eń bastysy, el basynda otyrǵan aıaýly azamattardan aıyryldyq. Bunyń basynda eń birinshi ult isteri jónindegi komıssar bolǵan Stalın otyrdy. Sondyqtan muraǵattardaǵy Stalın zobalańyna qatysty materıaldar memleket kómegimen zerttelinip, zerdelenip urpaq sanasyna jetkizilýi tıis», deıdi tarıhshy.
Onyń sózine qaraǵanda, Stalın KSRO-daǵy ulttardy tunshyqtyrý salasynyń sáýletshisi boldy. «Alashorda basshylarynyń ulttyq memleket qurý ıdeıasynyń da, ult kósemderiniń de túbine jetken - Stalın.Ol bul baǵytta Álibı Jangeldın, Muhamedııar Tunǵanshın, Kólbaı Toǵysov syndy keńes bıligin jaqtaýshylarǵa dem bere otyryp, Alashorda basshylarynyń ulttyq memleket týraly armanyn tunshyqtyryp, Keńes úkimetin berik ornyqtyrdy. Artynsha bulardyń barlyǵy qýǵyn-súrgin jyldarynda qurban boldy. 20-shy ǵasyrdyń basyndaǵy Alash bıligindegi azamattardyń barlyǵy bilimi, tájirıbesi mol, úlken oı-sananyń ıeleri boldy. Tipti olardyń bilim deńgeıi Máskeý bıliginde otyrǵandardan joǵary edi», deıdi M.Qoıgeldi.
Onyń aıtýynsha, Stalın men onyń qasireti tolyq zerttelip, qazirgi qoǵamdaǵy alash basshylary týraly alyp-qashpa áńgime toqtaýy tıis. «Óıtkeni 20 ǵasyrdaǵy bar qasirettiń basynda Stalın otyrdy», deıdi professor.
