Stadler vagondarynda qandaı kemshilik anyqtaldy — «Samuryq-Qazyna» AQ jaýaby
ASTANA. KAZINFORM — Stadler kompanııasynyń vagondary bıyl ekinshi toqsanda jetkiziledi. Bul týraly «Samuryq-Qazyna» AQ Ekonomıka jáne qarjy jónindegi basqarýshy dırektory Aıdar Rysqulov málim etti.
Búgin Májilistiń jalpy otyrysynda Májilis depýtaty Qaraqat Ábden eldegi vagon tapshylyǵy máselesin kóterdi.
— 2025 jyly jolaýshylar vagondary parkin jańartýǵa 65,5 mlrd teńge bólindi. Jospar boıynsha 68 vagon satyp alynyp, 2025 jyldyń sońyna deıin paıdalýǵa berilýi tıis edi. Keıin vagon sany 51-ge deıin qysqaryp, jetkizý merzimi de ózgerdi. Alaıda vagondar osy kúnge deıin qabyldanbaǵan, biraq bıýdjet qarajaty tolyq ıgerilgen. Nelikten vagondar ýaqytyly jetkizilmedi? , — dep surady Q. Ábden.
Óz kezeginde A. Rysqulov byltyr vagondardyń alǵashqy legin jetkizý kezinde tehnıkalyq másele anyqtalǵanyn aıtty.
— Naqty aıtsaq, vagondardyń tejegish júıesine ózgeris engizý kerek boldy. Sondyqtan vagondar qabyldanbady. Qazir Stadler kompanııasy búkil kemshiligin moıyndap, óz qarajaty esebinen kemshilikterdi joıyp jatyr. Vagondardy paıdalanýǵa berý bıylǵy ekinshi toqsanǵa belgilendi, — dedi Aıdar Rysqulov.
2022 jyly QTJ men Stadler arasynda uzaq merzimge shart bekitilip, 2030 jylǵa deıin jolaýshylar vagondaryn jańartý eskerilgen.
Eske salsaq, bıyl naýryz aıynda Kólik mınıstri Nurlan Saýranbaev Qazaqstanǵa Stadler jolaýshylar vagondarynyń alǵashqy legi qashan jetkiziletinin aıtqan edi.
