Stadler vagondary nege áli qabyldanbady – QTJ túsindirdi
ASTANA. KAZINFORM – «Qazaqstan temir joly» ulttyq kompanııasy Stadler jolaýshylar vagondary tejeý júıesine qatysty eskertýler tolyq joıylǵanǵa deıin paıdalanýǵa berilmeıtinin málim etti. Bul týraly Úkimettegi brıfıngte kompanııa ókilderi aıtty.
QTJ ókilderi shveıtsarııalyq Stadler kompanııasynyń málimdemesinde de tejeý júıesine qatysty anyqtalǵan máseleler boıynsha ulttyq tasymaldaýshynyń ustanymyna sáıkes keletin tustar bar ekenin atap ótti.
«QTJ» basqarma tóraǵasynyń strategııa jáne tsıfrlandyrý jónindegi orynbasary Anýar Ahmetjanovtyń aıtýynsha, sáıkessizdikter jańa jyljymaly quramdy qabyldaýdyń standartty rásimi kezinde anyqtalǵan.
Onyń sózinshe, atalǵan eskertýler Qazaqstanda da, ózge elderdiń temirjol ákimshilikterinde de qoldanylatyn talaptarǵa qatysty.
— Tejeý júıesi – jolaýshylar qozǵalysy qaýipsizdigin qamtamasyz etetin eń mańyzdy elementterdiń biri. Sondyqtan bul máselege erekshe mán beremiz. Bizdiń mindetimiz – jolaýshylardyń qaýipsizdigin tolyq qamtamasyz etý. Atalǵan sáıkessizdik jańa vagondardy qabyldaý kezindegi standartty baqylaý men sapany tekserý barysynda anyqtaldy. Biz bul rásimdi barlyq vagonǵa birdeı qoldanamyz, onyń Stadler nemese basqa óndirýshi ekenine qaramaımyz, — dedi ol.
Sonymen qatar ol Stadler kompanııasynyń barlyq eskertý 2026 jyldyń aqpanyna deıin joıylǵany jónindegi ýájine de toqtaldy.
— Munda kózqaras aıyrmashylyǵy bar. Bizdiń baǵalaýymyz boıynsha, qazirgi ýaqytta tejeý júıeleri belgilengen reglamentterge tolyq sáıkes kelmeıdi. Bul ustanymymyzdy tıisti qujattarmen, aktilermen bekitip, kompanııaǵa joldadyq. Qajet bolsa, tolyq túsindirý úshin óndirýshi tarapqa júgingen jón, óıtkeni olar – óndirýshi, biz – tapsyrys berýshimiz, bul vagondardy biz paıdalanamyz, — dedi ol.
«QTJ» basqarma tóraǵasy Talǵat Aldybergenovtiń aıtýynsha, synaqtar aıaqtalǵannan keıin jáne tıisti aktilerge qol qoıylǵan soń vagondardy qabyldaýǵa daıyndyq bar.
— Mamyr aıynda synaqtar ótti. Qazirgi tańda qozǵalys kezinde, ártúrli jyldamdyq rejımderinde jasalǵan synaq aktileri Stadler kompanııasynyń qol qoıýynda tur. Biz temirjol ákimshiligi retinde vagondardy qabyldaýǵa daıynbyz. Biraq barlyq eskertý tolyq joıylǵannan keıin ǵana olar paıdalanýǵa beriledi, — dedi ol.
Buǵan deıin Premer-mınıstr Oljas Bektenov Stadler vagondarynyń jetkizilimin odan ári sozbaýdy tapsyrǵanyn jazǵan edik.
