Statsıonardy erkin tańdaý quqyǵyn júzege asyrǵandardyń 46 paıyzyn aýyl halqy qurap otyr - S.Qaıyrbekova
ASTANA. 18 aqpan. QazAqparat - Statsıonardy erkin tańdaý quqyǵyn júzege asyrǵandardyń 46 paıyzyn aýyl halqy qurap otyr. Bul týraly búgin Parlament Májilisindegi Úkimet saǵatynda Densaýlyq saqtaý mınıstri Salıdat Qaıyrbekova málim etti.
«Týberkýlezben kúres biz úshin mańyzdy mindet bolyp qala beredi. Dál osy qurt aýrýyna shaldyǵatyndar men odan bolatyn ólim-jitim kórsetkishiniń tómendegenine qaramastan, bul másele áli de ózekti kúıinde qalyp otyr. Sondyqtan da, biz qurt aýrýyn erte kezden anyqtaý men onyń dıagnozy boıynsha bastapqy medıtsınalyq-sanıtarlyq kómekti kúsheıttik», - dedi mınıstr. Onyń aıtýynsha, bul baǵyttaǵy negizgi ekpin 2012 jyly Іshki ister mınıstrliginiń jabyq mekemelerinde aýrýǵa shaldyqqandardy emdeýge negizdelgen.
«Sonymen qatar, 2010 jyldan beri engizilip kele jatqan Biryńǵaı Ulttyq densaýlyq saqtaý júıesi patsıentke baǵdarlanǵan densaýlyq júıesin jańǵyrtýǵa múmkindik berdi. Statsıonardy erkin tańdaý quqyǵyn azamattarǵa usyný arqasynda ondaı kómektiń qoljetimdiligi qamtamasyz etildi. Al mundaı naýqastar sany 2010 jylmen salystyrǵanda 2,5 paıyzǵa artyp, 800 myń adamdy qurap otyr. Bir qýantarlyǵy, mundaı quqyqty júzege asyrǵandar arasynda aýyl halqynyń úlesi 46 paıyzǵa jetti», - dedi Salıdat Qaıyrbekova.
