Statsıonardan shyqqan patsıentter elordanyń medıtsına qyzmetkerlerine alǵys bildirdi
NUR-SULTAN. QazAqparat - Nur-Sultanda koronavırýstan 26 adam emdelip shyqsa, jalpy Qazaqstanda 27 adam koronavırýstan jazyldy. Dárigerlerdiń baqylaýymen statsıonarda bolǵan patsıentter medıtsına qyzmetkerlerine kásibı qyzmeti men kórsetken qamqorlyǵy úshin alǵys aıtty, dep habarlaıdy QazAqparat qala ákimdigine silteme jasap.
«Men karantınde 14 kún boldym. Búgin sońǵy kúnim, barlyq medıtsınalyq qyzmetkerlerge, dárigerlerge alǵys bildiremin. Olar bizge qamqor bola bildi. Tamaqtary óte dámdi. El turǵyndaryna aıtarym - karantındi elemeýge bolmaıdy. Asa jaýapkershilikpen qarańyz! Kúsh-qýatymyz-birlikte!»- dedi statsıonarda jatqan patsıent.
Koronavırýs ınfektsııasynyń taralýyna jol bermeý úshin statsıonardan shyqqan patsıentter taǵy 14 kún boıy úı karantıninde bolady. «Men shetelden ushyp keldim, meni karantınge jatqyzdy. COVID-19 saraptamasynyń nátıjesi teris bolyp shyqty. Karantınde barlyq jaǵdaı jasaldy, óte yńǵaıly boldy. Dárigerler jaǵdaıymdy kúnige tekserip, meniń temperatýram men dene qysymymdy ólshep jatyr. Kúnine bes ret dámdi tamaq beredi. Elimizde osyndaı dárigerler men medbıkeler bar ekenine óte qýanamyn», - dep taǵy bir emdelýshi medıtsına qyzmetkerlerine alǵys bildirdi.
Koronavırýspen kúresip jatqan medıtsına qyzmetkerleri syıaqy aldy. QR Prezıdenti Q. Toqaevtyń tapsyrmasyn oryndaý aıasynda Memlekettik komıssııa epıdemııaǵa qarsy is-sharalarǵa tartylǵan medıtsına qyzmetkerleriniń eńbekaqysyna aı saıynǵy bekitilgen ústeme aqy belgileý týraly sheshimdi bekitti.
Tólemder koronavırýsty juqtyrý qaýpi bar úsh top boıynsha 3 aıdyń ishinde júrgiziledi: «Qaýiptiligi asa joǵary» — reanımatsııa bólimshelerin qosa alǵanda, ınfektsııalyq statsıonarlardyń dárigerleri, orta jáne kishi medıtsına qyzmetkerleri. Ústemeaqy 20 eń tómengi jalaqyny quraıdy (Jalaqynyń eń tómengi mólsheri (JTM), 850 myń teńge). «Qaýiptiligi joǵary» – provızorlyq statsıonarlar men jedel járdem dárigerleri, orta jáne kishi medıtsına qyzmetkerleri. Ústeme aqy 10 JTM (425 myń teńge) quraıdy. «Qaýiptiligi ortasha» – karantındik statsıonarlardaǵy dárigerler, orta jáne kishi medıtsına qyzmetkerleri, sanıtarlyq dárigerler (memlekettik qyzmetkerler), jedel járdem júrgizýshileri jáne t. b. Ústeme aqy 5 JTM (212,5 myń teńge) quraıdy.
